DILI, 17 setembru 2020 (TATOLI)-Tribunal Distritál Dili (TTD) hala’o julgamentu ba arguidu ho inisiál ALX ne’ebé uza katana taa kanek nia maun (husi aman maun-alin) tanba goza partidu bloku koligasaun.
Tuir akuzasaun ne’ebé arrola husi Ministériu Públiku (MP) katak iha loron 27 fulan fevereiru 2019, lezadu Domingos fase hela nia karreta taxi no kanta dehan “bloku mak manan ka koligasaun mak manan, Aleixo Tak manan de’it ona”, entaun halo arguidu nervozu lori katana iha liman ba diresaun lezadu nian.
To’o iha lezadu nia fatin, arguidu la ko’alia buat ida ba lezadu, diretamente taa kedas lezadu dala rua kona iha lezadu nia kanotak okos no arguidu kontinua lori katana iha nia liman taa dala lima (5) ba lezadu nia isin lolon, kona iha ulun parte karuk dala ida, kona iha liman karuk dala ida ne’ebé rezulta suku pontu tolu, kona iha liman parte loos dala ida, kona iha liman laran parte loos dala ida no kona iha ain parte loos tolu.
Konsekuénsia husi arguidu nia konduta ne’e, rezulta lezadu kanek iha nia isin lolon no ran sai husi fatin atinjida ho nune’e lezadu ba halo tratamentu médiku iha Sentru Saúde Comoro.
Arguidu komete aktu ne’e ho forma livre, deliberadamente, konsentimentu no arguidu hatene katak ofende ema seluk fíziku ho lori sasán kro’at hanesan katana hodi ofende ema seluk nia isin lolon, nune’e proibidu no hetan punisaun tuir lei penal.
Arguidu hanesan autoria material, ba forma konsumada iha krime ofensa integridade fízika simples no arma branka, iha art. 145° n°1 no Lei arma branka n°5/2017 .
Hatán ba akuzasaun ne’e arguidu ho lezadu hateten, loos duni sira halo diskusaun tanba partidu polítiku. Nune’e arguidu dehan, nia parte hirus hodi taa lezadu too hetan kanek iha isin lolon no ulun.
“Ha’u taa nia tanba ha’u toba iha uma moras, nia mak abuza uluk ha’u depois nia lori ho safenda iha liman mai ha’u nune’e ha’u hakarak halo defeza ba ha’u nia aan nune’e taa nia,” arguidu deklara.
Rona tiha ne’e Tribunál tama kedas ba alegasaun, MP liuhusi prokuradór titular, Domingos Barreto haree ba faktu ne’ebé iha husu Tribunál atu fó pena prizaun tinan-lima.
Parte defeza husu atu aplika de’it pena kaman tanba motivu prinsipál la’ós arguidu maibé lezadu mak halo provokasaun ba arguidu.
Rona tiha alegasaun ne’e, Tribunál deside adia fila-fali julgamentu ne’e ba iha loron seluk hodi rona leitura desizaun ikus.
Julgamentu ne’e prezide husi juis koletivu Ersília da Silva, Afonso Carmona, Albertina Neves, MP reprezenta husi prokuradór Domingos Barreto no arguidu hetan asisténsia legal husi defensór públiku João Carvalho.
Jornalista : Nelson de Sousa
Editór : Francisco Simões
