Logotipu PACED. Imajen/Instituto Camões

DILI, 16 setembru 2020 (TATOLI)-Iha kinta (17/09) ne’e Uniaun Europeia (UE) no Instituto Camões,I.P sei realiza seremónia entrega materiál datoluk ba Polísia Sientífika Investigasaun Kriminál (PCIC, sigla portugés) hodi reforsa kapasidade atuasaun ba prevensaun no kombate krime organizadu.

Materiál hirak ne’e inklui ona ho produtu laboratóriu fundamentál atu realiza análize téknika ba situasaun ida (perísia) ho valór €7.000.

“Inisiativa ne’e promovida iha ámbitu Projetu Apoiu Konsolidasaun Estadu diretu (PACED, sigla portugés) iha PALOP Timor-Leste, ne’ebé finansia hosi Uniaun Europeia no ko-finansiadu no jere hosi Instituto Camões, ho objetivu atu konsolida Estadu Direitu iha nasaun, nune’e bele halo prevensaun no luta kontra korrupsaun, brankeamentu kapitál no krime organizada, no ein partikulár ba tráfiku droga,” refere nota ne’ebé Agência tatoli asesu iha kuarta ne’e.

Materiál sei entrega hosi Embaixadór UE iha Timor-Leste, Andrew Jacobs no Embaixadór Portugál iha Timor-Leste, José Pedro Machado Vieira, ba Diretór Nasionál PCIC, Vicente de Brito.

Antes ne’e, PCIC hetan materiál laboratóriu iha setembru 2019 no fevereiru 2020.

PACED kolabora iha baze regulár no ativa ho entidade nasionál oinoin hanesan Ministériu Justisa, Tribunál Rekursu, Prokuradór Jerál Repúblika (PGR, sigla portugés), Sentru Formasaun Jurídika no Judisiária, PCIC no Unidade Informasaun Finanseira, ho akompañamentu servisu hosi Núkleu Apoiu ba Ordenadór Nasionál hosi Ministériu Negósiu Estranjeiru no Kooperasaun (MNEK).

Intervensaun ne’e hanesan parte ida atu kapasita institusionál ba autoridade kompetente ba nível lejizlativu, ezekutivu no judisiáriu, ne’ebé hanesan programa interkámbiu no partilla rekoñesimentu no halo prátika di’ak.

Programa apoiu PACED iha durasaun to’o dezembru 2020, ho totál orsamentu millaun €8,4, kompostu hosi millaun €7 finansia hosi UE, hosi fundu europeiu ba dezenvolvimentu no Instituto Camões kooperasaun Língua,I.P, inklui millaun €8,05 administradu direita hosi Instituto Camões.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here