Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 16 setembru 2020 (TATOLI)-Ministériu Obra Públika (MOP) simu tetu fiskál Orsamentu Jerál Estadu (OJE) 2021 hosi Ministériu Finansa hamutuk millaun $178.

“Pakote tetu fiskál 2021 ne’ebé ami simu hamutuk millaun $178, ho porsentu boot liu ba akizisaun kombustível no manutesaun jeradór sira iha sentrál elétrika inklui manutensaun liña transmisaun, alokadu iha kategoria bens no servisu,” informa Ministru Obra Públika, Salvador Eugênio Soares dos Reis Pires, hafoin partisipa diskusaun ba preparasaun OJE 2021 MOP iha otél Novo Turismo, Bidau Lecidere, kuarta ne’e.

Maski nune’e, Ministru Salavador konsidera tetu fiskál ne’e limitadu, tanba iha ona inistiva no planu atu halo projetu foun hanesan bee-moos hamutuk pakote 55, estrada rurál ho distánsia kilómetru 200-resin ne’ebé hanesan programa reabilitasaun estrada iha territóriu tomak no estrada munisipál ne’ebé estudu la’o hela ho distánsia kilómetru 240 no eletrisidade hamutuk pakote 33.

Aleinde ne’e, MOP presiza finansia projetu hanesan bee-moos no estrada ne’ebé kontratu hahú ona hosi tinan 2019 no kuaze la ezekuta tanba pandemia COVID-19, limita movimentasaun no eziste konfinamentu iha nasaun barak halo traballadór sira la konsege mai halo serbisu.

“Ita-nia inisativa foun ba projetu bee-moos no eletrisidade, tanba ne’e tinan 2021 hanesan  tempu oportunu ba VIII Governu Konstitusionál atu hahú presta sebisu tuir meta ne’ebé trasa ona atu populasaun asesu ba estrada, eletrisidade no bee-moos,” Ministru subliña.

Governante ne’e dehan, tinan oin bele hahú nia konstrusaun tanba iha ona estudu desde tinan 2019.

“Ita hetan impedementu hosi surtu COVID-19 tanba konsultór sira labele mobiliza, maibé ita espera katak dezembru ita bele asesu ona estudu sira ne’e,” nia akresenta.

MOP sei fundamenta iha diskusaun ho Komité Revisaun Orsamentál Polítika (KROP), liuliu iha setór infraestutura atubele tau konsiderasaun ba inistiva projetu foun sira.

Pakote ne’ebé ministériu ne’e simu liga ba bens no servisu no verba seluk la inklui kapitál dezenvolvimentu.

“Ami halo ona diskusaun ho Primeiru-Minsitru no Vise Primeiru-Ministru no Ministru Planu no Ordenamentu no sei aprezenta iha fundu infraestutura. Ita iha inistiva no planu foun maibé sei la posível implementa kuandu laiha rekursu finaseiru,” nia afirma.

Iha OJE 2020 ho totál millaun $198, barak liu finansia despeza rekorrente hanesan akizisaun kombustível no manutensaun jeradór sentrál elétrika inklui liña transmisaun, ho despeza millaun $50.

Iha orsamentu tinan ne’e, MOP sei laiha projetu foun tanba ezekusaun ba fulan-rua de’it, maibé sei kontinua selu projetu sira ne’ebé tama ona iha kontratu tanba tenke halo pagamentu no orsamentu balun sei selu despeza Dotasaun Orsamentu Temporáriu (DOT) fulan-10 nian.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here