Semináriu ba komemorasaun loron mundiál proteje kamada ozóniu, iha Sala Leitura Xanana Gusmão, Bidau Lecidere, kuarta (16/09). Imajen Tatoli/Egas Cristovão

DILI, 16 setembru 2020 (TATOLI)-Sekretáriu Estadu Ambiente (SEA), Deométrio de Amaral do Carvalho, konvida komunidade atu proteje kamada ozóniu iha Timor-Leste liuhosi uza ekipamentu amigável ba ozóniu.

“Mai ita proteje kamada ozóniu liuhosi muda ekipamentu ne’ebé ita uza iha uma laran hanesan ar kondisionadu, refrijeradór no seluk tan ne’ebé iha gás ozone diplited substance (ODS), ita muda ba ekipamentu amigável ba ozóniu no kuida ita-nia ambiente ba jerasaun no futuru jerasaun,” tenik Sekretáriu Estadu Deométrio, hafoin partisipa semináriu iha ámbitu komemorasaun loron internasionál kamada ozóniu, iha Sala Leitura Xanana Gusmão, Bidau Lecidere kuarta ne’e.

Sekretáriu Estadu Ambiente
Deométrio de Amaral de Carvalho. Imajen Tatoli/Egas Cristovao

Iha loron 1994, Asembleia Jerál Organizasaun Nasaun Unida (ONU) proklama loron 16 setembru hanesan loron mundiál atu prezerva kamada ozóniu no ba komemorasaun mundiál asina iha tinan 1987, ho Protokolu Montreal (rezolusaun 49/114).

Ba komemorasaun loron mundiál prezerva kamada ozóniu ba dala-35, Timor-Leste foti tema “Ozone for Life”, ho objetivu kontinua halo esforsu proteje kamada ozóniu atubele mantein malirin no proteje nafatin ema, balada, no ai-horis sira husi radiasaun ultravioleta B UVB ne’ebé maka perigozu no kontinua esforsu implementa servisu Protokolu Montreal.

Iha fatin hanesan, Prezidente Permakultura Timor-Leste (PERMATIL), Ego Lemos, husu komunidade sira atu hapara sunu rai hodi kontribui ba hamenus poluisaun iha Timor-Leste.

Sekretáriu Estadu Ambiente, Demétrio de Amaral de Carvalho no Prezidente PERMATIL, Ego Lemos, sai oradór iha semináriu ho tema “Impaktu Poluisaun ba Meiu Ambiente, iha Sala Leitura Xanana Gusmão, Bidaun Lecidere, kuarta (16/09). Imajen Tatoli/Egas Cristovão

“Bainhira ita hakarak kontribui hadi’a ozóniu no hamenus poluisaun, tenke hapara tesi ai no hadi’a ambiente liuhosi kuda filafali ai atu nune’e bele prezerva fali bee-matan sira no bele halo rai buras inklui hamenus poluisaun,” nia fó hanoin.

Tuir Ego Lomos, atu hadi’a ozóniu no hamenus poluisaun maka komunidade sira tenke evita sunu materiál hanesan plásiku no kalen sira.

Nune’e mós, Estudante Univercidade Nacional Timor Lorosa’e (UNTL), Departementu Kímika, Deolindo Soares, konsidera presiza hapara sunu rai hodi kontribui ba poluisaun, tanba asaun ne’e bele fó impaktu ba kamada ozóniu.

“Ita presiza hapara sunu rai tanba daudaun ema barak sunu rai, ne’ebé bele kontribui ba  poluisaun no bele fó impaktu ba kamada ozóniu,” nia dehan.

Nia husu ba Governu kria lei hodi kontrola, nune’e bele redús ema halo poluisaun iha Timor-Leste no bele proteje kamada ozóniu.

Komemorasaun loron internasionál kamada ozóniu tinan ne’e, ho inisiativa Sala Leitura Xanana Gusmão hamutuk ho SEA, organiza semináriu ho tema “Impaktu Poluisaun ba Meiu Ambiente”.

Semináriu ne’e partisipa hosi PERMATIL, youth creative hosi Sala Leitura Xanana Gusmão inklui estudante UNTL.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here