Sekretáriu Estadu Ambiente, Deométrio de Amaral do Carvalho. Imajen Tatoli/Egas Cristovão

DILI, 16 sembru 2020 (TATOLI)-Sekretaria Estadu Ambiente (SEA) hetan tetu orsamentu 2021 hosi Ministériu Finansa (MF) hamutuk millaun $1,2, ne’ebé montante ne’e tun kompara ho orsamentu iha tinan-2019 ho montante millaun $1,321.

Sekretáriu Estadu Ambiente, Deométrio do Amaral de Carvalho, bainhira relata progresu serbisu ba Primeiru-Ministru (PM), Taur Matan Ruak, husu mós atu iha aumentu orsamentu.

“Orsamentu 2021 prevee ba Sekretáriu Estadu Ambiente millaun $1,2, ne’e ki’ik liu kompara ho orsamentu tinan kotuk. Presiza aumentu orsamentu tanba papél SEA maka define prioridade iha konseitu rekuperasaun, ne’ebé tenke iha kondisaun ruma nune’e bele halo serbisu ba rekoperasaun ekonómika iha parte ambiente,” dehan Sekretariu Estadu Deométrio, kuarta ne’e, iha Palasiu Governu.

Nia konsidera, Sekretaria Estadu ne’e iha papél importante tanba tama iha prioridade lima iha konseitu rekuperasaun ekonómika, nu’dar pilár prinsipál ba ambiente, tanba ne’e presiza kondisaun ruma no kontribui garante sustentabilidade ekonómika iha pakote rekuperasaun ekonómika.

“Antisipadamente informa ba Primeiru-Ministru kona-ba difisiénsia orsamentu ne’ebé atribui ba ambiente atu mellora serbisu sira iha 2021 nian, entaun ami iha intensaun atu husu adisionál balun,” nia karesenta.

SEA hakarak halo kontribuisaun ba ambiente hanesan kombate Lafaek, hasa’e rezeliénsia hasoru alterasaun klimátika, no mós atu halo rekopersaun ambiente ne’ebé maka estragu inklui implementasaun dekretu-lei kona-ba eleminasaun plástiku no envolve empreza privadu balun halo resiklajen.

“Ami hanoin presiza iha aumentu atubele atinje millaun $2,1 atu ami bele halo serbisu ho di’ak liután, liuliu tanba pakote rekuperasaun ekonómiku ein termu konsepsuál tau mos ambiente hanesan pilár importante ida,”nia dehan.

Biban ne’e, Xefe Governu husu atu parte SEA prepara proposta revizaun orsamentu ne’ebé sei realiza iha segunda (21/09) no fahe na komisaun haat hodi bele avalia.

Governante ne’e nota katak bainhira ambiente di’ak maka bele garante sustentabilidade tanba iha kondisaun moris saudável.

SEA daudaun ne’e iha diresaun nasionál hitu no ajénsia rua hanesan servisu ba lisensiamentu ambientál no fundu ba alterasaun klimátika.

“Governu rasik presiza iha kondisaun atubele serbisu ho dignu no diresaun sira bele halo servisu di’ak liután no hasa’e produtividade,” nia fó hanoin.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here