Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (16/09). Imajen Tatoli/Egas Cristovão

DILI, 16 setembru 2020 (TATOLI)-Ministru Koordenadór Asuntu Ekonómiku, Joaquim Amaral, aprezenta ona projetu dekretu-lei ne’ebé hetan ona aprovasaun hosi Konsellu Ministru (KM), kona-ba apoiu atu rekupera no mantein atividade akonómika  iha ámbitu rekuperasaun ekonómika.

Apoiu ne’e sei simu kada fulan, durante fulan-haat tuituir malu hafoin dekretu-lei vigora.

“Projetu dekretu-lei ne’e ho objetivu atu estabelese apoiu rua ba entidade empregadora no traballadór ba konta própria, ne’ebé konsidera nesesáriu no adekuadu tebes ba rekuperasaun ekonómika,” hateten Ministru Prezidénsia Konsellu Ministru, Fidelis Manuel Leite Magalhães hafoin ramata reuniaun KM iha Palásiu Governu, kuarta ne’e.

Nune’e, entidade hirak ne’ebé tama ona iha rejime kontributivu seguransa sosiál no inskreve ona iha sistema fiskál, ne’ebé hato’o katak sira lakon volume negósiu ka reseita no hakarak atu rekupera operasaun.

“Sei iha direitu ba dispensa parsiál ka sorin balun hosi kontribuisaun mensál ba seguransa sosiál no atribuisaun montante pekuniáriu mensál ida, ne’ebé hanaran subsídiu atu rekupera ka mantein atividade ekonómika,” Ministru akresenta.

Tuir governante ne’e, atubele hetan asesu ba apoiu ne’e, entidade empregadora sira tenke tama ona iha sistema seguransa sosiál to’o bainhira diploma ne’e vigora.

Enkuantu, emprezáriu individuál sira no traballadór pur konta própria no traballadór doméstiku sira sei hetan asesu ba apoiu ne’e maski foin inskreve bainhira diploma ne’e vigora, maibé tenke inskreve nafatin iha seguransa sosiál, mínimu liu fulan-tolu hafoin simu apoiu ikusliu.

Nia reforsa, entidade sira iha obrigasaun atu halo nafatin servisu normál no loke nafatin ba públiku, la inklui benefisiáriu hirak ne’ebé hetan impedimentu atu halo serbisu normál, liuliu kompañia aérea no ajénsia viajen sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here