Saudozu Tomás Correia de Oliveira Alias “Oli Lemorai”. Imajen/Espesiál.

DILI, 16 setembru 2020 (TATOLI)—Parlamentu Nasionál (PN), ohin, aprova votu pezár ba saudozu Tomás Correia de Oliveira “Oli Lemorai”. Parlamentu Nasionál aprova votu pezár ne’e ho rezultadu votasaun a-favór 59.

Veteranu 24 anos ne’e hakotu iis iha Hospital Nacional Guido Valadares (HNGV) iha loron 2 setembru 2020 ho idade tinan 63.

Proponente ba votu pezár ne’e komposta hosi Deputadu Cornélio Gama “L7”, David Dias Ximenes “Mandati”, Agustinho Siqueira “Somoxo”, Mariano Assanami Sabino no António da Conceição.

Xefe Bankada PLP, Deputadu Cornélio Gama “L7” hateten saudozu Oli Lemorai ninia luta ba prosesu libertasaun barak tebes.

“Ami halo asaltu barak tebes tanba ami hamutuk,” L7 informa liuhosi plenária Parlamentu Nasionál, kuarta ne’e.

Nune’e mós Deputadu Agustinho Siqueira “Somoxo” hato’o sentida kondolénsia ba saudozu Oli Lemorai ne’ebé hakotu ona peregrinasaun hosi mundu.

“Parlamentu Nasionál no Estadu Timor-Leste, votu pezár ne’e rekoñesimentu ida-ne’e hodi fó onra ba Oli Lemorai ne’ebé luta 24 anos ba ita-nia independénsia tanba guerileiru 24 anos oituan de’it,” dehan Somoxo.

Entretantu, Deputadu Partidu Demokrátiku, Mariano Assanami Sabino husu estadu tau-matan ba oan sira tanba merese hetan atensaun.

“Sira-ne’e mak 24 anos ita presiza haree sira lubuk ida, 24 anos ne’e estadu tenke tau-matan ba nia oan sira. Ita rekoñese iha Parlamentu no estadu tenke tau-matan ba oan-ki’ak sira,”  Assanami propoin.

Nune’e mós Xefe Bankada PD, Deputadu António da Conceição hato’o sentida kondolénsia kle’an ba família enlutada.

“Votu pezár ida-ne’e ho intensaun tenke haree futuru ida di’ak liu ba oan kiak sira. Iha ambiente polítiku ne’ebé la’o hela tenke lori ba kotuk kona-ba pazajen naruk ba prosesu luta libertasaun nasionál. Iha pasadu ne’e ema sira-ne’e sakrifika-aan, se ita hanoin pazajen sira-ne’e ita tenke kosntroi futuru ida di’ak liu ba 24 anos sira,” Kalohan fó hanoin ba estadu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here