Ministru Prezidénsia Konsellu Ministru, Fidelis Manuel Leite Magalhães. Imajen Tatoli/Egas Cristovão

DILI, 16 setembru 2020 (TATOLI)-Liuhosi reuniaun Konsellu Ministru (KM), ezekutivu sira aprova ona projetu dekretu-lei, ne’ebé aprezenta hosi Ministra Saúde, Odete Maria Freitas Belo, ba alterasaun dahuluk dekretu-lei númeru 3/2019 05 marsu, kona-ba Estrutura Orgánika Ministériu Saúde (MS) nian. 

“Alterasaun importante hosi diploma ne’e maka harii Diresaun Nasionál Saúde iha Família, nune’e bele kompleta atribuisaun tarefa hosi Ministériu Saúde ne’ebé define iha Orgánika VIII Governu Konstitusionál,” relata Ministru Prezidénsia Konsellu Ministru, Fidelis Manuel Leite Magalhães, hafoin ramata reuniaun KM iha Palásiu Governu, kuarta ne’e.

Nune’e mós, atu responde di’ak liután ba dezafíu hirak ne’ebé enfrenta iha nível kuidadu saúde primáriu nian

Diresaun Nasionál Saúde iha Família ne’e sei liuhosi estabelesimentu kondisaun legál no operasionál ne’ebé fasilita envolvimentu ema no família barak liután iha atividade saúde nian.

Notísia Relevante: MS re-ativa sistema saúde iha família

Iha loron 24 agostu 2020, MS reativa hikas programa saúde iha família, ne’ebé sistema saúde ne’e la’ós de’it programa ida maibé modelu koletivu integradu ba prestasaun kuidadu saúde primária ne’ebé foku ba ema no ba família liuhosi vizita domisiliáriu regulár iha ámbitu ba vizita sistema saúde públiku no universál.

Sistema saúde  iha família hamosu rejistu eletróniku ne’ebé aprezenta solusaun liuhosi dadus dijitál atualizadu.

Elementu sentrál hosi modelu intregadu ne’e maka ekipa  saúde na familia iha Sentru Saúde, kompostu hosi grupu profisionál saúde ne’ebé halo vizita ba uma-kain sira hanesan vizita rutina, regulár no  integrál no mós vizita epidemiolojika.

Ekipa sira ne’e observa no rejista estadu saúde hosi uma-kain idaidak no karateriza tuir nesesidade sira.

Haree mós ba fatór risku no impaktu sosiál no ambientál saúde nian no organizasaun sira akompañamentu nian.

Programa saúde iha família lansa 22 jullu 2015 no ekipa médika sira vizita ona uma-kain hamutuk porsentu 94 iha territóriu no rejista ona dadus hamutuk porsentu 84 hosi populasaun.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here