Segundu Komandante Polisia Munisípiu Dili, Superintendente Asistente, Euclides Belo. Imajen Tatoli/Antonio Goncalves

DILI, 16 setembru 2020 (TATOLI)- Komandu Polísia Munisípiu Dili, ohin, hala’o sensibilizasaun ba programa prevensaun krime ba estudante sira husi Institutu Siénsia Saúde (ICS).

Notísia Relevante : Komandu PNTL hahú sosializa programa “Polísia ba kampus”

Segundu Komandante Polísia Munisípiu Dili, Superintendente Euclides Belo, esplika sensibilizasaun ne’e nu’udar parte ida husi programa “Polisia Vizita Kampus” hodi sensibiliza servisu Polisiamentu Komunitária, no Seguransa Rodoviáriu, no servisu Investigasaun Kriminál nian bele hatene.

Euclides dehan, eskola sekundáriu too universidade sira nu’udar fatin ba ema atu aprende no estudante sira presiza koopera hodi minimiza kazu krime atu labele akontese iha fatin edukasaun nian.

“Ohin, ami mai halo atividade ne’ebé iha ICS ne’e programa komandu nian ne’ebé ho nia mehi katak servisu hamutuk hodi garante kapitál Dili seguru ba ema hotu, liu-liu husi estudante sira oinsá atu minimiza kazu krime sira,” dehan  Superintendente Euclides iha ICS, Comoro, Dili.

Matéria ne’ebé PNTL lori hodi halo sensibilizasaun ba estudante sira mak hanesan servisu Polisiamentu Komunitária, seguransa rodoviáriu nian, no investigasaun kriminál nian, hodi fahe informasaun jerál ba estudante sira bele hatene hodi kontribui ba paz.

Euclides iha esperansa katak, bainhira sensibiliza hotu matéria hirak ICS bele servisu hamutuk ho polísia para bele garante Dili sai fatin seguru no dixiplina hodi evita problema oin-oin.

Iha fatin hanesan, Reitór Institutu Siénsia Saúde (ICS), Domingus Soares, agradese  ho kooperasaun servisu Komandu Polísia Dili hodi  implementa programa Polísia Vizita Kampus hodi sensibiliza regra no knaar servisu polísia nian ba estudante sira.

Domingos Soares dehan, informasaun ne’ebé polísia fahe bele fó hanoin ba estudante sira, nune’e sira bele iha koñesimentu kona-ba servisu polísia nian hodi servisu hamutuk garante paz no estabilidade.

“Ha’u fiar metin katak ha’u nian estudante sira ne’e sei koopera ho polísia para kria estabilidade  iha rai ida ne’e, tanba servisu atu garante seguransa la’ós de’it iha polisia nia liman, maibé ita hotu-hotu  nia liman,” nia hateten.

Programa sensibilizasaun ne’e hetan partisipasaun másimu husi estudante ICS inklui dosente no funsionáriu sira.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here