Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno. Imajen Tatoli/Egas Cristovão

DILI, 16 setembru 2020 (TATOLI)-Governu liuhosi reuniaun Konsellu-Ministru, kuarta ne’e halo ona alterasaun no aprovasaun ba dekretu lei hodi halo pagamentu kona-ba subsídiu faze daruak nian ba estudante Timoroan naun bolseiru iha nasaun hitu hamutuk ema 30-resin.

Ministra Negósiu Estranjeiru no Kooperasaun (MNEK), Adaljiza Magno, hateten iha pagamentu faze dahuluk nian Governu la konsege aprova lista estudante Timoroan iha nasaun hitu ne’e.

Notísia Relevante :Aban, Governu altera lei pagamentu subsídiu ba estudante

Timoroan na’in 30-resin ne’e estuda iha nasaun Repúblika Populár Banglades, Reinu Béljica, Repúblika Populár Xina, Repúblika Koreia Súl, Reinu Unidu da Grã-Británia no Irlánda Norte, Repúblika Mozambique no Singapura.

“Ohin halo alterasaun ba lei ki’ik oan ida, hodi halo pagamentu ba estudante naun bolseiru sira iha estranjeiru, dekretu ida uluk la inklui nasaun hitu ne’ebé temi ona,” dehan Governante ne’e ba jornalista sira iha Palacio do Governo Dili, kuarta ne’e.

Governu sei hahú halo pagamentu ba estudante hirak ne’e hafoin Prezidente Repúblika, Francisco Guterres Lú Olo, promulga dekretu lei ne’e.

“Kustu selu ne’e nafatin tuir kustu nasaun idaidak nian, maibé ida ikus ne’e osan la barak hanesan ida uluk ne’e,” nia dehan.

Entretantu, kona-ba estudante na’un bolseiru hamutuk na’in 500-resin ne’ebé la konsege hetan pagamentu iha faze dahuluk nian, oras ne’e MNEK ho Komisaun ba Fundu COVID-19 halo ona aprovasaun hodi halo pagamentu ho osan hamutuk rihun 200-resin.

Notísia Relevante :Governu sei selu tan subsídiu ba Timoroan iha nasaun hitu

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here