Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (16/09). Imajen Tatoli/Egas Cristovão

DILI, 16 setembru 2020 (TATOLI)-Iha reuniaun Konsellu Ministru (KM) kuarta ne’e, ezekutivu sira analiza opsaun polítika-lejizlativa ba alterasaun daruak dekretu-lei númeru 1/2007 18 janeiru, kona-ba estatutu orgánika Sekretariadu Tékniku Administrasaun Eleitorál (STAE).

Ministru Prezidénsia Konsellu Ministru, Fidelis Manuel Leite Magalhães, hateten diploma ne’e aprezenta hosi Ministru Administrasaun Estatál, Miguel Pereira de Carvalho, maibé seidauk iha desizaun finál no sei aprezenta no halo diskusaun klean iha reuniaun ezekutivu tuir mai

“Alterasaun ne’e ho objetivu atu harii estrutura forte no adekuadu, nune’e bele presta profisionalizmu no kualidade organizasaun ba prosesu eleitorál hotu hosi partidu polítiku no sidadaun tomak,” tenik Ministru Fidelis hafoin reuniaun KM iha Palásiu Governu.

Kriasaun STAE bazeia ba dekretu Governu númeru 2/2003 23 jullu, ne’ebé hanesan órgaun tutela ba MAE ho responsável ba ezekusaun prosesu eleitorál Estadu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here