Ilustrasaun violénsia doméstika. Imajen/Google

DILI, 16 setembru 2020 (TATOLI)-Tribunál Distritál Díli (TDD), ohin, hala’o julgamentu ba arguidu LDSM, ne’ebé deskonfia komete krime tentativa omisídiu hasoru lezada VSP nu’udar arguidu nia fen kaben.

Faktu ne’ebé arrola husi Ministériu Públiku (MP) katak, arguidu ho lezada iha relasaun nu’udar la’en ho fen, hahú moris hamutuk iha 2015 no iha oan mane ida ho idaté tinan-tolu.

Antes arguidu ho lezada iha problema hanesan la’en ho fen, lezada halai sai husi sira-nia uma iha Bairru-Pité, Dili, husik hela sira nia oan ki’ik ho arguidu, hodi ba  hela tiha ho nia inan-aman sira iha Kintál-Ki’ik, Dili.

Iha loron 6 marsu 2020, tuku 14:00 Otl, arguidu ba testemuña NSJ nia uma iha Matadouru, Dili, husu ajuda atu testemuña ko’alia ho lezada para fila-fali ba arguidu nia uma hodi haree sira-nia oan.

Iha tuku 16:00 Otl, lezada telefone ba testemuña depois testemuña aproveita hodi kontakta ba lezada katak, “Orasida kalan ita tur hamutuk iha Rate Seroja ka Taman Makam Palahwan, Balide, arguidu mós sei ba hotu.”

Iha  tuku 19:00  Otl, arguidu mai iha testemuña refere nia uma iha Matadouru, maibé iha nia bolsu tau tudik, depois testemuña tula arguidu ho motorizada sira ba iha Rate Seroja, Balide.

Sira to’o iha ne’ebá tuku 20:00 Otl, lezada ho testemuña sira seluk tur uluk iha ne’ebá hemu hela serveja super bock. Arguidu tun husi motór ba hasoru uluk lezada no rein tiha nia reen-toos no husu deskulpa ba lezada.

Arguidu kontribui mós $15.00 ba sosa tan serveja, antes arguidu ho testemuña Ak to’o, lezada ho testemuña sira seluk hemu uluk serveja, testemuña NN ho testemuña LD ho motorizada ba sosa serveja.

Arguidu ho lezada tur sees tiha husi testemuña sira seluk no arguidu tenta konvense lezada atu fila-fali moris hamutuk hodi haree sira-nia oan, maibé lezada hatán fila dehan “labarik iha ó ne’e mate tiha mós di’ak.” Nune’e, lezada dehan tan nia lakohi fila ba sira-nia uma  iha Bairru-Pité.

lia hirak ne’e halo arguidu nervozu.  Bainhira haree lezada ho lanu hamriik (soe bee) iha sira nia-oin iha estrada boot, arguidu hasé dehan, nusa lezada  soe bee iha ne’e no lezada hatán dehan ,“ó sibuk ha’u halo saida”, no akompaña ho lia-fuan tolok dirije ba arguidu.

Ho nervozu arguidu hamriik dudu sees tiha lezada no lezada fila atu tuku fali, mak arguidu hasai tudik husi bolsu laran parte loos no sona dala ida ba lezada nia hirus-matan leten karuk, depois sona tan dala ida iha kotuk-laran.

Arguidu haree ran sai ba hakuak tiha lezada no depois husik monu ba rai. Arguidu ta’uk no halai fila ba nia uma.

Arguidu halo ho vontade rasik ho propózitu konkretiza, antes prepara tudik tiha ona, tenta oho lezada  nu’udar nia kaben rasik.

Tudik nu’udar objetu ida perigozu, sona ba iha zona hirus matan no kotuk laran nu’udar diresaun partikularmente perigozu tenta atu hasai lezada nia vida, partikularmente konsidera indefesa tanba lezada ho kondisaun lanu.

Arguidu hatene momoos katak nia konduta proibida no punida husi lei penál. Ho nune’e , arguidu LDSM ho autoria materiál ho forma  konsumada prátika krime ida Omisídiu Agravadu ho forma tentada punidu no previstu iha artigu 139, aliña g no artigu 248 aliña 2, hotu-hotu hosi KP no krime ida Armas Branka husi artigu 20, Lei númeru 5/2017.

Hatán ba akuzasaun hirak ne’e ,arguidu konfesa ba tribunál katak  faktu sira ne’e loos hotu. Arguidu mós konfesa tan, durante arguidu tama kumpre hela medida koasaun prizaun preventiva iha prizaun.

Arguidu LDSM hatete momentu ne’ebá nia parte buka tuir  lezada semana ida sai husi uma la tama fali tanba labarik ka sira na’in-rua nia oan tanis loos.

Nia deklara, nia lori tudik sona lezada tanba nervozu  lezada dehan fali labarik mate tiha de’it mós di’ak.

Nune’e mós lezada VSP hatete , nia ho arguidu iha problema balun  nune’e nia parte sai husi uma ba hela iha nia inan-aman durante semana ida.

Rona deklarasaun ne’e, Tribunál adia hikas julgamentu ne’e ba iha  loron 28 fulan setembru tinan ne’e, tuku 17:00 Otl, hodi rona alegasaun finál.

Audiénsia julgamentu ne’e prezide husi juiz koletivu Ivan Suritay, Maria Solana no Ana Paula Fonseca, Ministériu Públiku reprezenta husi Prokuradór Alfeu Moreira, arguidu  hetan asisténsia legál husi advogadu privadu Gil Amaral.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here