Governu Timor-Leste liuhosi Ministériu Asuntu Kombatentes Libertasaun Nasionál (MAKLN) hamutuk no familia sira hala’o serimónia funebre ba Saúdozu Veteranu Rezistensia Faustino dos Santos “Renan Selac” iha Jardin dos Herrois e Martires da Patria Lautem.  Imajen TATOLI/Eugénio Pereira.

DÍLI, 15 setembru 2020 (TATOLI)–Governu liuhosi Ministério Para os Assunto dos Combantentes da Libertação Nacional halo hela polítika liuliu ba fatin ne’ebé atu haloot veteranu sira bainhira hakotu sira-nia jornada moris iha mundu ne’e.

Notísia Relevante: Governu-família haloot Renan Selak nia mate-isin liuhosi serimónia rituál

“Veteranu sira 24 anos bainhira fila ba Aman Maromak nia kadunan santu, di’akliu hakoi iha Lospalos. Ohin, hahú ho saudozu Faustino dos Santos “Renan Selak” no veteranu sira seluk ne’ebé mate sei hakoi iha iha Semitériu Espesiál Erois Pátria iha munisipál,” dehan Ministro do Ministério Para os Assunto dos Combantentes da Libertação Nacional, Julio da Costa Sarmento “Meta Malik”, ba Agência TATOLI hafoin haloot mate-isin Saudozu Renan Selak iha Jardim dos Herois e Martires da Pátria Lautém, tersa ne’e.

Tuir ministru, kritériu atu haloot saudozu sira iha Jardim dos Herois e Martires da Pátria Metinaru no Lautém ne’e depende ba desizaun ka polítka Governu nian maibé serimónia haloot mate-isin Renan Selak nian hahú ona iha Lautém.

“Kritéria ita mak halo ka Governu mak halo polítika. Ita tetu. Ita halo esplikasaun. Ita halo diálogu ho veteranu sira hafoin iha konkordansia mak ita halo. Governu la mai obriga sira maibé esplika ba família hafoin hola desizaun,” nia hateten.

Governante ne’e hateten, veteranu sira 24 anos bainhira iis kotu di’ak liu hakohi iha Lospalos tanba rezutadu hatudu katak ema ua’in mak partisipa hodi asiste serimónia funerál. Maibé, nia dehan, se hakohi iha Metinaro ne’e dalaruma ema ladún barak tanba kestaun distánsia dook.

“Ohin ita haree Lospalos-oan sira partisipa no hamriik hotu iha ne’e hodi akompaña serimónia funebre. Se ita lori ba Metinaro, dalaruma família iha Lospalos ladún barak no grupu oan ida mak ba hakoi,” nia dehan.

Entretantu, nia hateten, saudozu sira ne’ebé haloot ona iha Jardim dos Herois iha Metinaro ne’e sei la muda fali ba fatin seluk, maibé bele halo monumentu iha ida-idak nia munisípiu ka moris fatin.

Jornalista: Zezito Silva

Editór: Cancio Ximenes

HAKEREK NO HATÁN

Please enter your comment!
Please enter your name here