Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (16/09). Imajen Tatoli/Egas Cristovão

DILI, 16 setembru 2020 (TATOLI)-Ezekutivu sira liuhosi reuniaun Konsellu Ministru (KM) aprova projetu dekretu-lei ligadu ho alterasaun dahuluk dekretu-lei númeru 21/2020 05 juñu, ne’ebé kria ona subsídiu temporáriu ida iha ámbitu atu hatan ba COVID-19, hodi fornese subsídiu ba estudante timor-oan naun bolseiru iha estranjeiru ne’ebé hela temporáriu iha estranjeiru.

Projetu dekretu-lei ne’e aprezenta hosi Ministra Negósiu Estranjeiru no Kooperasaun, Adaljiza Albertina Xavier Reis Magno.

“Liuhosi alterasaun ne’e sei abranje tan mekanizmu kobertura ba nasaun lubuk-ida, nune’e aumenta mós númeru timor-oan ne’ebé sei hetan protesaun liuhosi subsídiu ne’e iha momentu ne’ebé efeitu pandemia kontinua fó nafatin efeitu dramátiku ba mundu tomak,” relata Ministru Prezidénsia Konsellu Ministru, Fidelis Manuel Leite Magalhães, hafoin ramata reuniaun KM iha Palásiu Governu, kuarta ne’e.

Nasaun ne’ebé sei inklui maka Bangladesh, Bélzika, Xina, Koreia du Sul, Reinu Unidu, Mozambique no Singapura, atu simu subsídiu faze daruak ba estudante naun bolseiru.

Notísia Relevante: Governu sei selu tan subsídiu ba Timoroan iha nasaun hitu

Iha sorin seluk, Ministra Negósiu Estranjeiru no Kooperasaun, Adaljiza Albertina Xavier Reis Magno, informa reklamasaun ba segundu faze aprova ona pur volta 560 ho totál osan $200.000 resin.

Antes ne’e, Governu konklui ona transferénsia subsídiu ba estudante timor-oan naun bolseiru hamutuk 2.351 ho totál orsamentu $1.343.100 ba pagamentu fulan-tolu, iha nasaun Estadu Unidu Amérika (EUA), Portugal, Brazil, Vietname, Malázia, Filipina, Thailandia, Índia, Austrália no Indonézia.

Estudante timor-oan iha EUA hamutuk na’in-12, kada estudante simu $ 3.000, kada fulansimu $1.000x3x12= $36.000, Filipina iha estudante 205, kada fulan sei simu $150x3x205= $ 92.250, Brazil iha estudante 34, kada fulan simu $150x3x34=$15.300, Índia iha estudante ida kada fulan simu $ 100×3=$300.

Estudante ualu iha Austrália, kada fulan simu $500x3x8=$12.000, Thailandia estudante na’in-neen, kada fulan estudante ida simu $150x3x6=$2.700, Portugal iha estudante na’in-461 no kada fulan estudante ida simu $500x3x461=$691.000, Vietname iha estudante hamutuk na’in-40 no kada fulan estudante ida simu $150x3x40=$18.000, no iha Malázia iha estudante na’in-sia no kada estudante ida simu $150x3x9= $ 4.050.

Iha Indonézia pagamentu ba kada estudante hamutuk $100 ba fulan-tolu, hahú hosi Jakarta iha estudante na’in-1.121 ho totál osan $336.300, Bali iha estudante na’in-226 no totál osan $67.800, Atambua na’in-33 no totál osan $9.900, no kupang na’in-195 totál pagamentu $58.500, nune’e totál pagamentu ba estudante iha Indonézia hamutuk.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here