Prezidente Parlamentu Nasionál (PPN), Deputadu Aniceto Longuinhos Guterres. Imajen/Joanico de Araujo.

DILI, 16 setembru 2020 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes, hateten deputadu sira labele hala’o funsaun ho di’ak no kualidade tanba laiha espasu própriu ne’ebé adekuada.

Notísia Relevante: Prioridade PN 2021 sei prodús lei, halo fiskalizasaun no harii edifísiu foun

“Deputadu sira ka Parlamentu Nasionál labele hala’o sira-nia funsaun ho di’ak no kualidade sein espasu própriu no adekuadu. Tanba ne’e mak iha Lejislatura ida-ne’e ita presiza fó kontinuidade ba esforsu halo konstrusaun sede Parlamentu Nasionál foun ne’ebé hahú tiha ona dezde Lejislatura dahuluk nian,” Aniceto Guterres ko’alia liuhosi sesaun solene abertura ba Lejislativa datoluk iha Lejislatura dalima, iha plenária Parlamentu Nasionál, tersa ne’e.

Aniceto Guterres hatutan, alende espasu própriu, nesesária tebes atu iha apoia téknika espesializada, apoia administrativa no jestaun ne’ebé ho kualidade, imparsiál no onestu hosi serbisu administrasaun parlamentár nian.

Prezidente Parlamentu Nasionál, ejize mós funsionáriu públiku no pesoál téknika hala’o sira-nia funsaun tuir prinsípiu integridade, imparsialidade, apartidarizmu ho dedikasaun iha unidade orgánika hotu-hotu.

Maibé Aniceto Guterres hateten, preokupasaun ida-ne’e presiza responde mós enkuadramentu organizasaun funsionamentu administrasaun parlamentár ne’ebé efikaz no efetivu.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here