Ministru Petróliu no Minerál, Victor da Conceição Soares. Imajen Tatoli/António Gonçalves

DILI, 16 setembru 2020 (TATOLI)-Ministru Petróleu no Minerál, Víctor da Conceição Soares, hateten sei kontinua kontinua estudu no polítika ba dezenvolvimentu setór petrolífera, liuliu ba dezenvolvimentu kampu Greater Sunrise.

“Ha’u sei kontinua estudu tékniku no polítika sira iha dezenvolvimentu setór petrolífera nian, tanba VIII Governu Konstititusionál hakarak kontinua nafatin. Ita presiza halo ajustamentu iha parte balun no hadi’a lei organika ba estabelesementu insitutisionál no re-estutura, tanba ne’e atualiza de’it,” tenik Ministru Víctor, kuarta ne’e, iha Palásiu Governu.

Governu liuhosi MPM mós toma konsiderasaun ba estudu sira ne’ebé halo ona hodi kontinua  ba dezenvolvimentu setór petrolífera hanesan harii planta liquefied natural gas (LNG), supply base iha Betano no dada Kadoras mai Timor-Leste.

Ba inisiativa ne’e, Ministru Víctor informa, nia parte fó ona orientasaun  ba tékniku iha Timor Gás no Petróleu, Empreza Públika (Timor-GAP.E.P), Autoridade Nasionál Petróleu no Minerál (ANPM) inlui Instituto Petróleu e Geolojia (IPG) atu kontinua analiza estudu sira ne’ebé halo ona antes ne’e.

“Ita-nia ekipa tékniku sira analiza hela estudu saida mak uluk halo ona no saida mak seidauk halo, atu ida ne’ebé seidauk halo maka ita bele halo hotu atu sai planu integradu dada Greater Sunrise mai iha Timor-Leste,” nia akresenta.

Maski nune’e, governante ne’e rekoñese surtu COVID-19 fó impkatu ba negosiasaun konseitu dezenvolvimentu kampu Greater Sunrise entre Governu Timor-Leste no Austrália inklui kompañia konsórsiu sira iha tasi Timor.

Membru ezekutivu ne’e rejeita deklarasaun ne’ebé dehan nia parte politiza dezenvolvimentu setór petrolífera, liuliu Greater Sunrise tanba nia konsidera asuntu ne’e interese nasionál ne’ebé presiza ema hotu nia esforsu.

Antes ne’e, Eis Xefe Negosiadór Prisipál  Delimitasaun Fronteira Marítima, Kay Rala Xanana Gusmão, rekomenda Governu atuál presiza define didi’ak polítika dezenvolvimentu setór petrolífera, liuliu ba dezenvolimentu Greater Sunrise.

Nia husu ezekutivu sira tau interese nasionál aas tanba halo ona estudu, ne’ebé nia rasik ho ninia ekipa la’o kuaze nasaun hotu hodi haree parte téknika no polítika viável ona atu dada kadoras mai Timor-Leste inklui vizita kompañia internasionál sira hodi mai investe iha projetu petrolífera.

Hafoin Governu Timor-Leste no Austrália troka nota diplomátika kona-ba tratadu fronteira marítima no entra ein vigór 30 agosru 2019, Estadu liuhosu ANPM hala’o negosiasaun ho Governu Austrália no kompañia sira hodi finaliza konseitu dezenvolvimentu Greater Sunrise.

Ba kestaun ne’e, Estadu rua halo hela negosiasaun hodi iha konkordánsia mak bele hala’o esplorasaun ba kampu tanba media line ne’ebé fahe fronteira, kampu ne’e balun tama iha área jurizdisaun Austrália.

Iha prosesu negosiasaun antes ne’e, Greater Sunrise dada mai Timor-Leste sei a-favór porsentu 70 no Austrália hetan porsentu 30 no dada ba Austrália afavór porsentu 20 no ba Timor-Leste porsentu 80.

Daudaun Timor-Leste iha partisipasaun maioria iha konsórsiu projetu kampu Greater Sunrise, ne’ebé Timor-GAP maka reprezenta Estadu ho Partisipasaun hamutuk porsentu 56,56, Woodside (operadór) ho porsentu 33,4 no Osaka Gás reprezenta porsentu 10.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here