DILI, 15 setembru 2020 (TATOLI)-Tribunál Distritál Dili (TDD) liuhusi desizaun juis singular, ohin, aplika pena admoestrasaun no selu kustu judisiáriu ba arguida ho inisiál PSDC (inan) no arguidu NDCDC (oan) ba kazu pekulatu uzu utiliza veíkulu Estadu ba interese privadu.
Notísia Relevante : Inan-Oan Uza Veíkulu Estadu Ba Interese Família
Iha leitura akórdaun, Juiza Ana Paula Fonseca, hateten, tuir entendimentu tribunál nian ba aktu sira durante produsaun prova iha prosesu julgamentu, nune’e mós ho deklarasaun arguidu no arguida nian konfesa ho parsialmente ba faktu sira provadu hotu.
Arguida PSDC hanesan funsionáriu públiku iha Ministériu Planeamentu Investimentu no Estratéjiku (MPIE) no Arguidu NDCDC hanesan ajente Polísia Nasionál Timor-Leste (PNTL).
Iha loron 26 marsu 2019 iha tuku 15:30 Otl, arguida PSDC fó imprensa uza motorizada Estadu ho matrikula 1730 GA, marka Honda Beat, pertense ba Gabinete MPIE ba arguidu NDCDC hodi tula nia oan ba eskola.
Arguidu hafoin hetan autorizasaun hodi uza motorizada Estadu husi arguida nia rasik entrega tutan ba nia ria ho inisiál ECM hodi tula arguidu NDCDC nia oan ba eskola.
Hafoin arguidu nia rian ECM tula tiha arguidu nia oan ba eskola, nia uza motorizada refere hodi hala’o atividade privadu iha loron sábadu.
Juiza Ana Paula Fonseca, hateten, haree ba sirkunstánsia krime ne’e, parte sira konfesa integralmente no foin primeira vez mai iha Tribunál ho arrepende ba hahalok sira antes tanba ho situasaun obriga mezmu sira hatene hela hahalok ne’e kontra lei.
Tribunál haree hodi pondera aplika pena admoestrasaun (hukuman peringatan) iha artigu 82 iha kódigu Penál Timor ne’ebé hatete kuandu konsidera ajente kulpadu tanba halo krime ne’ebé fó-fatin ba pena prizaun abstrata la aas-liu tinan-tolu ka multa, tribunál bele fó de’it admoestasaun ba nia, kuandu, kumulativamente: a) Konduta kriminoza nia prejuizu hadi’a tiha ona; b) Ajente delinkuente primáriu ida; c) Admoestasaun too atu halo prevensaun kriminál no atu rekupera delinkuente.
Nune’e mós Tribunál aplika selu kustu judisiáriu $60.00 ba arguida ho arguidu kada ema ida selu $30.00
Audiénsia julgamentu ne’e prezide husi juis singular Ana Paula Fonseca, MP reprezenta husi Prokuradora Lidia Soares no arguidu ho arguida hetan asisténsia legal husi Advogadu Privadu Fernando da Costa.
Jornalista : Nelson de Sousa
Editór : Francisco Simões
