Memensio Sequeira Freitas.

Hosi: Memensio Sequeira Freitas*)

Jeralmente, People Power ninia signifikadu hanesan ho forsa populár, iha ne’ebé sira esforsa aan luta ho forma protesta ka kontesta hasoru forma tirania no arbitariedade (abuzu poder ka autoritarizmu) ruma. Nu’udar forsa populár, People Power envolve ema barak (maioria) hosi nasaun ida-nian (sidadaun hotu-hotu ne’ebe pertense ba país refere) atu tuun lisuk iha manisfestasaun nia laran.

Bolu People Power ne’e labele envolve de’it grupu ki’ik balu ka ema na’in hira oan de’it. People Power mós indika iha ema ne’ebé sei tuun hodi halo asaun no la’ós bazea ba ema na’in hira mak halo asinatura atu hatuun Prezidente Repúblika ida hosi ninia mandatu.

People Power mosu dala uluk no koñesidu iha mundu bainhira mosu manifestasaun masál ne’ebé halo hosi povu Filipina iha tinan 1986 ho objetivu akaba rezime Prezidente Ferdinand Marcos. Protestu refere mosu bainhira Corazon Aquino (feen hosi líder opozisaun, Benigno Aquino Jr) ne’ebé lansa kampaña anti violénsia atu hatuun Marcos.

Tuir referénsia balun ne’ebé hakerek na’in hetan asesu hosi Amazine (08/09/2020), Aquino halo protestu nu’udar konsekuénsia hosi Marcos nia deklarasaun vitória iha eleisaun prezidensiál iha 1986. Pur volta tinan 2010 no 2011, movimentu ida-ne’e mosu tan atu hakotu rezime otoritáriu no antí demokrasia iha nasaun sira iha área ka zona Árabe, ne’ebé koñesidu ho Arab Spring ka Árabe primaveira.

Clara Aprilia Sukandar (2019) iha ninia artigu ida entituladu “Apa itu People Power”? Ne’ebé ha’u asesu liu hosi shorturl.at/loGPV defini “People Power adalah penggulingan kekuasaan presiden secara paksa melalui aksi demonstrasi rakyat. Upaya ini dilakukan dengan cara seluruh rakyat turun ke jalan agar Presiden meletakkan jabatannya karena dinilai telah melanggar konstitusi atau melakukan penyimpangan”.

Katak People Power ne’e forsa populár ida ho objetivu hatuun ka derruba Prezidente Repúblika ida-nia mandatu ho obrigatoriamente liuhosi asaun demonstrasaun. Esforsu ida-ne’e halo ho maneira povu tomak nasaun ida-nian (boot ka ki’ik, feto eh mane, katuas-ferik ou foin sa’e sira) hodi ezije ba Prezidente Repúblika renúnsia ninia aan hosi ninia titulár (kargu) tanba kontra konstituisaun ka komete ba hahalok ruma ne’ebé dezvia hosi Lei.

Issue People Power mós mosu ona iha Timor-Leste ne’ebé koñesidu ho Grupu Rezisténsia Nasionál Defende Justisa no Konstituisaun (RNDJK) ne’ebé xefia hosi portavós Angela Freitas (Prezidente Partidu Trabalhista Timor). Grupu ida-ne’ebé eziste iha tinan ne’e nia klaran mosu ho alvu hatuun Prezidente Repúblika, Francisco Guterres “Lú-Olo”, tanba sira haree katak PR kontra ona Konstituisaun Repúblika. Hosi sira-nia konferénsia imprensa dala barak ne’ebé hala’o iha sede grupu nian, portavós sempre divulga sei uza People Power, sei hatuun populasaun barak (pur volta 200.000 resin) atu halo manisfestasaun pasífika iha Dili hodi halo petisaun ba Prezidente Repúblika, obriga rezigna hosi ninia kargu.

Hatún Prezidente Repúblika ho Manifestasaun ho ninia Konstitusionalidade

Iha loron sesta feira, dia 26 juñu tinan ne’e, iha sede Partidu Trabalhista ne’ebé sai mós sede ba RNDJK, Angela Freitas ameasa sei hatuun populasaun liuhosi justisa populár ka (People Power) atu ezije ba Prezidente Repúblika rezigna aan. Razaun ne’ebé lori portavós RNDJK hato’o deklarasaun ne’e mak tanba PR Lú-Olo la reprezenta ona Povu no Nasaun maibé reprezenta de’it partidu polítiku nia interese.

Aktu hirak ne’e hatudu liuhosi nomeasaun no tomada de posse ba Membru Governu daualuk nian, ne’ebé tuir portavós ne’e katak la tuir Konstituisaun. Nia hatutan bainhira PR la rezigna aan mak nia sei mobiliza massa hodi halo asaun pasífika hasoru Prezidente Repúblika (Tempo Timor, edisaun 5023, June 26, 2020).

Angela Freitas mosu dala barak iha ekraun televizaun nian hodi akuza Prezidente Repúblika kontra Konstituisaun Repúblika maibé la aprezenta razaun jurídiku ruma kona-ba ninia deklarasaun rasik. Aleinde ne’e, portavós RNDJK ne’e mós hanesan líder partidu polítiku ida (embora ninia partidu la hetan asentu iha PN no la tuir eleisaun jerál dala barak ona). Maibé, hanesan líder polítiku ida, Angela Freitas divia aprezenta kazu konkreta ruma ne’ebé PR halo ona hodi la kumpre KRDTL ka tanba PR nia aktu sira konsideradu hanesan ditadór ida.

Ita-nia Konstituisaun Repúblika atribui kompeténsia lubuk ida ba PR atu bele ezerse ninia mandatu tomak. Artigu 85 (alineia a to’o j) atribui kompeténsia própriu ba PR atu hala’o ninia knaar, inklui foti no fó pose ba Primeiru Ministru ne’ebé partidu eh aliansa partidu sira ho maioria parlamentár sei foti, bainhira rona partidu polítiku sira-ne’ebé iha Parlamentu Nasionál (alineia d hosi artigu 85). Iha parte seluk, artigu 86 (alineia a to’o o), fó mós kompeténsia ba PR hodi hala’o knaar ba órgaun seluk Estadu nian. Nune’e, PR la halo kompeténsia arbiru, fora hosi kompeténsia ne’ebé KRDTL atribui ba nia. PR Lú-Olo mós deklara fila-fila ona katak nia sei halo tuir no kumpre de’it Konstituisaun Repúblika.

Se durante ezerse ninia mandatu, mak PR komete karik krime ruma, inklui la kumpre Konstituisaun, mak KRDTL fó mós dalan oinsá mak PR tenke hatán ba Supremu Tribunál Justisa nian atu bele prosesa tuir lei. Artigu 79 hosi KRDTL fó roman ba ita oinsá mak PR ida bele hatan iha tribunál karik nia komete iha kazu ka krime ruma. Númeru 2 hosi artigu ne’e klaramente dehan “Prezidente Repúblika sei hatán ba Tribunál Supremu Justisa nian, kona-ba krime ne’ebé akontese bainhira hala’o nia knaar, no mós violasaun momoos no boot kona-ba nia obrigasaun Konstitusionál”.

Maibé atu ba iha ne’ebá, númeru 3 hosi artigu ne’e mak tenke sai lalenok atu PR bele responsabiliza ba ninia aktu inkostitusionalidade. Ne’e katak, la’ós naran sidadaun ida bele kondena PR tuir ninia hakarak (tanba liberdade espresaun no direitu sidadaun nian), mais prosesu tomak ne’e tenke hahú ho hala’o de’it iha Parlamentu Nasionál, nu’udar instituisaun ida ne’ebé reprezenta sidadaun tomak.

Rezisténsia Nasionál Defende Justisa no Konstituisaun mós deklara ona katak sira prepara ona figura balun atu troka fali Prezidente Lú-Olo. Iha Timor Post edisaun agostu 20, 2020, portavós grupu ne’e deklara sira prepara ona ema ida, maibé seidauk bele fó sai ema ne’e sé, atu simu fali knaar hodi troka PR atuál. Ba ida ne’e, ita mós presiza tuir regra ne’ebé hatuur iha KRDTL, iha ninia artigu 84 kona-ba substituisaun no internidade.

Númeru 1 hosi artigu ne’e klaramente dehan “Bainhira iha impedimentu temporáriu ba Prezidente Repúblika, Prezidente Parlamentu Nasionál mak sei hala’o ninia knaar eh, ida-ne’e labele karik, ninia substitutu”. Ne’e hatudu, la’ós naran sidadaun baibain ida mak nomea ema ida atu troka fali PR. Ne’e duni, atu troka ka substitui PR ida mós presiza tuir ninia koridór ne’ebé hatuur ona iha KRDTL, la’ós tuir gostu ka liu de’it hosi deklarasaun ida ou liu de’it hosi asaun pasífika ida.

Iha parte seluk, se Prezidente Repúblika ida hakarak renúnsia hosi ninia kargu karik, KRDTL fó ona ninia regra atu ita la’o tuir. Artigu 81 hosi KRDTL fó dalan oinsá PR ida bele renúnsia ninia aan. Katak PR mak tenke manda mensajen renúnsia nia ba Parlamentu Nasionál no renúnsia ne’e foin válidu hafoin PN simu mensajen refere. Maibé, renúnsia ida-ne’e katak bazeia ba ninia hakarak rasik ou tanba iha inkapasidade permanente ruma ka mate ka tanba hetan ona koñesimentu renúnsia hosi PN. Artigu ne’e la dehan PR ida bele renúnsia ninia mandatu bainhira iha grupu ka movimentu ruma ne’ebé ejize PR atu rezigna aan hosi ninia mandatu.

Haree hosi ninia naran “Rezisténsia Nasionál Defende Justisa no Konstituisaun”, ita hotu hakarak katak grupu ida-ne’e tenke la’o tuir duni artigu KRDTL nian ne’ebé mensiona iha leten. Atu hatuun Prezidente Repúblika ida iha Nasaun demokrátiku ida hanesan Timor-Leste, ita presiza tuir korridór Konstituisaun nian. Troka Prezidente Repúblika ida ne’e tuir nia dalan rasik, mak eleisaun prezidensiál ne’ebé hatuur iha artigu 76 Konstituisaun Repúblika nian.

Nune’e, se PR atuál la hala’o karik ninia obrigasaun konstitusionalmente, mak ita hein to’o 2022, liu hosi eleisaun prezidensiál. Basta, grupu ida-ne’ebé lidera hosi Angela Freitas prepara ona figura di’ak ida, kompetente no potente, iha koñesimentu di’ak ba Estadu no Konstituisaun, atu kompete liu hosi eleisaun prezidensiál oin mai, tanba povu mak sei hili liu hosi sira-nia votu.

Kona-ba atu substitui Prezidente Repúblika ida, Jaime Valle (2004, p. 241) deskreve “o problema da substituição do Chefe do Estado em caso de impedimento, morte ou renúncia, até à designação de um novo titular, é, como já se referiu, um problema comum às diversas ordens jurídicas, que é susceptível de receber várias soluções: desde a delegação de poderes, em que o titular encarrega outrem do seu exercício, comum nas antigas formas de governo monárquicas , até à vicariedade, em que existe um órgão vigário do Presidente da República, que está investido no poder específico principal da substituição deste, como sucede geralmente nos sistemas de governo presidenciais, e de que é exemplo o Vice-Presidente dos Estados Unidos da América, passando pela suplência, em que o titular de outro cargo – em regra o Presidente do Parlamento ou o Chefe do Governo – assume temporariamente o exercício dos poderes do Presidente da República, que é a solução mais comum nos sistemas de governo parlamentares ou semipresidenciais, em que o Chefe do Estado não é simultaneamente o Chefe do Governo como é o caso, por exemplo, da Guiné-Bissau ou de Portugal”.

Komu ita komunga sistema semi-prezidensialista, iha ne’ebé Prezindensia Repúblika nu’udar órgaun unipesoál, mak karik iha impedementu, mate, inkapasidade permanente ka renúnsia, entaun titulár ne’ebé bele substitui Prezidente Repúblika mak atuál Prezidente Parlamentu Nasionál hodi hein to’o eleisaun ba Prezidente Repúblika foun hafoin loron 90 nian laran (númeru 1 hosi artigu 83). Dala ida tan, Konstituisaun la dehan tanba Prezidente Repúblika la hala’o ninia knaar tuir KRDTL mak grupu ida bele hamriik uza People Power hodi hatuun Prezidente Repúblika hosi ninia mandatu.

Istória People Power iha Mundu ne’ebé Konsege Hatuun Prezidente Repúblika

Se ita haree uituan ba istória mundiál, iha Prezidente Repúblika lubuk ida mak konsege hatuun hosi ninia povu rasik liuhosi dalan People Power. Kazu konkreta ne’ebé ita bele haree mak hanesan Prezidente Repúblika Lybia, Muammer Gaddafi ne’ebé ukun povu Lybia durante tinan 42 nia laran. Gaddafi konsege tuun hosi ninia mandatu hafoin mosu funu sivíl entre grupu pro no kontra iha tinan 2011 liu ba. Ho tulun hosi NATO, Gaddafi konsege tuun hosi ninia mandatu nu’udar Prezidente Repúblika ne’ebé lansa hosi golpista sira.

Prezidente Filipina, Ferdinand Marcos (1965-1986) ne’ebé ukun país ne’e ho ditadura, ikus mai ninia povu rasik hamriik liu hosi People Power iha tinan 1986 (períodu ikus hosi ninia ukun. Mezmu populasaun barak konsidera Ferdinand nu’udar prezidente ida ho prestasaun di’ak, maibé liuhosi lider opozisaun (Benigno Aquino Jr nia feen), konsege hatuun populasaun barak hodi halo manifestasaun no obriga prezidente refere rezigna aan hosi ninia kargu. Razaun fundamentál ne’ebé obriga People Power mosu mak tanba Ferdinand envolve aan iha kazu korupsaun, koluzaun no nepotizmu durante ninia mandatu.

Iha tinan 1998, liu hosi forsa “reformasi” iha Indonézia, estudante universitáriu no juventude pro demokrasia sira konsege hatuun Prezidente Soeharto ne’ebé ukun Indonézia durante tinan 32 nia laran. Embora Soeharto konsideradu nu’udar “Bapak Pembangunan Indonézia” maibé tanba nia konsideradu mós hanesan ditadór (tanba forsa militár domina iha ninia ukun). Ho razaun ida-ne’e no tanba mós kauza Timor-Leste ne’ebé hamosu presaun internasionál, mak iha tinan 1998, estudante pro demokrasia sira konsege obriga jenerál boot Indonézia nian ne’e rezigna aan hosi ninia kargu no entrega fali ba Prezidente B. J. Habibie nu’udar ninia vise hodi kontinua lidera Indonézia to’o eleisaun foun.

Hosni Mubarak ne’ebé konsege ukun rai Egiptu durante tinan 30 nia laran mós ninia povu rasik konsege hatuun nia hosi dalan People Power. Movimentu “Arab Spring” sai hanesan núkleu ne’ebé rezulta Mubarak ninia mandatu nakdoko. Ofisilmente, Hosni Mubarak deklara rezigna hosi ninia kargu iha loron 11 fulan fevereiru tinan 2011. Razaun fundamentál hosi People Power hasoru Mubarak mak tanba nia akuzadu envolve iha kazu korupsaun no abuzu poder.

Hosi istória mundiál sira iha leten kona-ba forsa hosi People Power hodi hatuun Prezidente Repúblika ne’e maioria tanba prezidente hirak ne’e asume kargu durante tinan naruk nia laran, tanba konsideradu ditadór no tanba mós envolve iha kazu korupsaun no abuzu podér. Oinsá ho Prezidente Lú-Olo? Seráke kazu sira iha leten komete mós hosi ita nia Prezidente Repúblika atuál? Prezidente Lú-Olo nu’udar ema ida ne’ebé lidera Asembleia Konstituante hodi hakerek Konstituisaun Repúblika ne’ebé Sra. Angela deklara defende ba ne’e.! Ha’u hanoin, atu akuza Prezidente Lú-Olo kontra KRDTL ne’e tenke bazea ba razaun forte no jurídiku ruma, no la apenas ba razaun polítika.

Hosi istória mundiál ne’ebé iha kona-ba Prezidente Repúblika ida tuun hosi nia kargu tanba People Power, tanba prezidente hirak ne’e ukun liuhosi tinan 10. Ita-nia Prezidente Repúblika atuál, seidauk kompleta tan ninia mandatu ba períodu ida tomak. Sedu liu se ita konsidera prezidente Lú-Olo kontra Konstituisaun, enkuantu ita rasik la aprezenta artigu ida-ne’ebé mak PR atuál la kumpre. Tanba ne’e, iha opiniaun balun ne’ebé mosu, inklui opiniaun hosi doutór Avelino Coelho no doutór José Ramos Horta, sujere atu ita hein to’o mandatu remata mak ita bele troka prezidente Lú-Olo hosi ninia kargu liuhosi eleisaun prezidensiál foun.

Iha parte seluk, ho situasaun globál pandemia COVID-19 ne’ebé halo roda ekonomia mundiál kuaze la la’o ho di’ak no ho impase polítika ne’ebé naruk tanba dezentendimentu polítika hosi lider polítiku sira, ha’u hanoin, hatún Prezidente Repúblika ne’e la’ós buat nesesáriu no urjente ida.

Buat ne’ebé nesesáriu no urjente mak polítiku sira hotu-hotu (liu-liu partidu sira ne’ebé hetan asentu iha Parlamentu Nasionál) no lider partidu polítiku sira atu lolo liman ba malu hodi ita bele ultrapasa lalais tiha situasaun impase polítika ida ne’e. Nune’e, ita nia povu bele moris hakmatek nafatin ho ekonomia ida ne’ebé di’ak tuir espíritu ukun rasik aan ninia. (**)

*) Hakerek na’in nu’udar profesór Biolojia ida iha Eskola Sekundária Públika Olocassa Ossú (Viqueque) no oras ne’e hela iha Ossú.

2 KOMENTÁRIU

  1. Agradese wain ba Artigu ne’ebé furak tebes,maske barak maibé konsege Le too hotu no refleta duni situasaun real iha Timor-Leste…Proud Off You…💪

HAKEREK NO HATÁN

Please enter your comment!
Please enter your name here