iklan

HEADLINE, LAUTÉM, MUNISÍPIU

Presta omenajen ikus, PM Taur: “adeus maun Renan”

Presta omenajen ikus, PM Taur: “adeus maun Renan”

Saudozu Faustino dos Santos ‘Renan Selak’. Imajen/Espesiál.

LAUTÉM, 15 setembru 2020 (TATOLI)-Primeiru-Ministru (PM), Taur Matan Ruak, partisipa no presta omenajen ikus iha seremónia funebre saudozu Faustino dos Santos ‘Renan Selak’ iha ninia moris fatin aldeia Ira-ara, suku Fuiloru, postu administrativu Lospalos, munisípiu Lautém.

Iha seremónia funebre ne’e, Xefe Governu hato’o mensajen ikus ba saudozu “adeus maun Renan” no konsidera erói sira nunka mate maibé isin lolon maka mate.

“Espíritu no klamar la mate, tanba ne’e Maun Renan sei moris ho ita, jerasaun ba jerasaun sei la haluha nia, ba buat hotu ne’ebé nia halo ba nasaun hodi ohin loron nasaun ne’e sai livre no independente,” dehan PM Taur iha ámbitu funebre ba saudozu Renan Selak iha aldeia Ira-ara, tersa ne’e.

Notísia Relevante: Veteranu “Renan Selak” hakotu I’is iha HNGV, adeus erói TL

Nia dehan, nasaun tomak sei la haluha kontribuisaun saudozu iha tempu okupasaun to’o independénsia.

“Ita husu Nai Maromak atu fó fatin ba nia hodi horik rohan laek, husu ba nia atu kontinua tau-matan ba nia kaben, oan sira no maun-alin sira hotu, tau-matan mós nia maluk veteranu sira hotu ne’ebé espalla iha nasaun laran tomak hodi hotu-hotu kontinua banati tuir nia hahalok ne’ebé di’ak ne’ebé husik hela iha ita hotu nia le’et,” nia subliña.

Xefe Governu haktuir, istória saudozu Renan Selak la sees hosi istória nasaun nian, ne’ebé la’o, terus, no moris hamutuk hodi husik fatin ida ba ema hotu.

“Timor-oan hotu, ita sente orgullu tebes ba kontribuisaun ne’ebé nia halo no erói sira halo ba ita-nia nasaun. Governu rekoñese no hodi Estadu tomak nia naran hakarak agradese ba família ne’ebé fó mós kontribuisaun ba ita-nia nasaun,” nia akresenta.

Entretantu, seremónia ne’e partisipa hosi, Prezidente Tribunál Rekursu Deolindo dos Santos, Ministru Asuntu Kombatente Libertasaun Nasionál Júlio da Costa ‘Meta Malik’, Xefe Estadu FALINTIL-Forsa Defeza Timor-Leste (F-FDTL) Major Jenerál Lere Anan Timur, Prezidente Konsellu Kombatente Libertasaun Nasionál Vidal de Jesus ‘Riak Leman’, Vise-Ministru Turizmu, Komérsiu no Indústria Domingos Lopes Antunes, Vise-Ministru Edukasaun, Juventude no Desportu António Guterres, Deputadu Mariano Asanami Sabino, veteranu no kombatente, komunidade, militár, no família boot saudozu.

 Jornalista: Antónia Gusmão

Editora: Julia Chatarina

iklan
iklan

Leave a Reply

iklan
error: Content is protected !!