Prezidente Parlamentu Nasionál, Aniceto Guterres. Imajen /Egas Cristóvão.

DILI, 15 stembru 2020 (TATOLI)—Parlamentu Nasionál no Governu sei konsentra ba ajenda lejizlativa nune’e asegura kualidade produsaun lejislativa ho kualidade.

Notísia RelevantePN-Governu presiza serbisu hamutuk apoia CAC implementa lei MPCC

“Iha aspetu rua relasiona ho kompeténsia lejizlativa ne’ebé Parlamentu tenke tau atensaun hanesan koordenasaun no konsertasaun ho Governu kona-ba ajenda lejizlativa no eskrutíniu atentu no kompetente hodi halo justifikasaun adekuada no fundamentasaun sufisiente ba proposta ka projetu-lei sira hodi asegura kualidade produsaun lejislativa ne’ebé benefísia povu,”  Prezidente Parlamentu Nasionál Deputadu Aniceto Guterres, esplika liuhosi plenária iha ámbitu sesaun lejislativa foun iha plenária Parlamentu Nasionál, tersa ne’e.

Aniceto Guterres hateten, iha kontestu ida-ne’e merese fó atensaun maka’as ba lee no hanoin, ko’alia ho forma eskrutíniu ida-ne’ebé bele hatudu mós ho kapasidade fiskalizasaun lejizlativa.

Nune’e, nia dehan, bele alkansa plenu komprimentu ninia funsaun konstitusionál mak Parlamentu Nasionál estabelese objetivu estratéjiku ida ba períodu 2017-2022 atu asegura katak lei no polítika públika sira reflete sidadaun sira-nia nesesidade.

“Atu garante realizasaun objetivu ida-ne’e mak presiza komunikasaun dinámika permanente entre deputadu sira no eleitór sira hodi konkretiza direitu ba petisaun no partisipasaun ativa sosiedade sivíl iha serbisu Parlamentu Nasionál nian,” nia dehan.

Deputadu Aniceto Guterres subliña, presiza akompaña proativamente lejizlasaun ne’ebé prodús hosi Governu. Área  ida-ne’e presiza atensaun másima, ho serbisu maka’as hodi fó dalan ba sosiedade nia kontribuisaun iha atividade parlamentár.

“La’ós de’it iha debate lejizlasaun maibé prinsipalmente inisiativa sosiedade ninia kona-ba lei sira-ne’ebé presiza kria ka presiza modifika no fó atensaun liubá komunidade ka sidadaun sira-ne’ebé la hetan reprezentasaun adekuada. Katak, la inklui iha sosiedade sivíl organizada ho kriasaun espasu ba promove sira-nia partisipasaun efetiva,” nia hatetetn. 

Prezidente Parlamentu Nasionál fundamenta, dalan ida-ne’ebé importante ba komunikasaun dinámika no permanente entre deputadu sira no sidadaun sira iha sira-nia funsaun reprezentasaun demokrátika.

Aniceto Guterres realsa, Parlamentu Nasionál mós presiza serbisu maka’as hodi halakon frakeza sira-ne’ebé liga ba área akompañamentu no fiskalizasaun produsaun lejizlativa hosi Governu no akompañamentu implementasaun lei sira-ne’ebé Parlamentu Nasionál aprova.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here