Xefe Bankada Partidu Demokrátiku (PD), António da Conceição ‘Kalohan'. Imajen TATOLI/António Gonçalves

DILI, 15 setembru 2020 (TATOLI)—Bankada Partidu Demokrátiku (PD) iha Parlamentu Nasionál kontinua defende diálogu hodi promove entendimentu ba asuntu interese nasionál.

“Lala’ok polítika ne’ebé lejizlatura ida-ne’e hala’o iha uma lisan povu nian ne’e, hetan dezáfiu polítiku lubun. Diálogu nu’udar dalan hodi promove entendimentu ba asuntu interese estadu nian la hetan fatin. Auzénsia diálogu ne’e implika ezersísiu funsaun órgaun soberanu sira hahú hosi Prezidénsia Repúblika no habelar mai to’o Parlamentu Nasionál ne’ebé ikus mai mós hada’et ba Governu no Tribunál sira,” Xefe Bankada PD, Deputadu António da Conceição “Kalohan”, hato’o deklarasaun polítika iha ámbitu sesaun lejizlativa datoluk iha lejizlatura dalima nian iha plenária Parlamentu Nasionál, tesa ne’e.

Xefe Bankada PD ne’e rejista faktus lubun hodi timoroan hotu halo reflesaun hamutuk iha loron ida ohin.

Xefe Bankada PD ne’e fundamenta, la fó pose ba membru balun koligasaun nian nu’udar membru Governu hosi koligasaun AMP hosi Prezidente Repúblika reproduz hikas iha relasaun polítika bankada parlamentár sira iha orgaun aas ida-ne’e.

Ida-ne’e, nia dehan, hahú kedan hosi inisiu abertura atu hala’o kna’ar iha fulan-juñu 2018 ne’ebé mós hetan nia pontu másimu ho retirada OJE 2020 hosi Governu iha fulan dezembru 2019 no tuir kedas rejeita aprovasaun OJE 2020 iha 17 fulan-janeiru 2020.

Nune’e mós Kanselmentu pedidu lubun Prezidente Republika nian hosi Parlamentu Nasionál kona-ba vizita xefe-estadu nian ba rai-li’ur hanesan Portugal, Cabo-Verde, Japaun, Austrália no mós atu partisipa iha sesaun ba 73º  Organizasaun Nasaun  Unida nian no mós vizita ba Roma hodi hasoru malu ho Amu Papa hamihis no hakiik tiha komunikasaun entre bankada polítika sira iha Parlamentu Nasionál.

Xefe Bankada PD ne’e hatutan, Governu nia pedidu atu foti osan millaun $650 atu sosa asaun ba dezenvolvimentu posu mina Greater Sunrise ne’ebé hetan votu mean hosi opozisaun tempu ne’ebá haboot hikas distansiamentu entre líder sira nasaun nian no líder partidu polítiku sira.

“Votu Mean hodi la aprova Tratadu Tasi Timor ne’ebé define soberania tomak país nian hakanek fuan ema hotu ne’ebé hadomi ukun rasik aan no nega servisu la hatene kolen sidadadaun patriota, lutadór, funu na’in, Komandante FALINTIL rezisténsia nian ne’ebé ema barak no kuaze ema hotu bolu naran Maun Boot Xanana Gusmão,” nia dehan.

Xefe Bankada PD ne’e temi faktu hirak ne’e la’ós halo ho hanoin atu hafahe maibé halo atu hanoin kle’an no konsiensializa atu sente no hatene todan nu’udar efeitu hosi hahalok polítiku hanesan ne’e.

“Todan boot tebes ida-ne’ebé mai hosi ita-nia hahalok polítika sira-ne’e mak dada (trava) no demora ita-nia dezenvolvimentu nasionál. Ita iha ona tinan klaran jornada ukun VIII Governu nian, Governu ida-ne’ebé hahú nu’udar AMP no ohin loron politikamente viabiliza hosi partidu FRETILIN hafoin OJE 2020 la hetan aprovasaun iha 17 fulan-janeiru tinan ne’ebé mak sei la’o hela iha uma lisan povu nian ida-ne’e,” Xefe Bankada PD haktuir. 

Kalohan fó hanoin katak ho inisiu lejislativa foun ida-ne’e ba Parlamentu Nasionál, ba Prezidénsia Republika, ba Governu, hotu-hotu iha devér atu afirma hodi fo mós esperansa foun ba povu terus na’in sira.

Ho lisensa ba Prezidente Republika, ba prezensa ne’ebé onra tebes atu Bankada PD hato’o hanoin balun atu tetu lisuk katak Prezidente Republika ne’ebé tuir konstituisaun mak xefe estadu nian, reprezenta no garante nasaun nia independénsia, estadu nia unidade no instrituisaun demokrátika sira-nia funsionamentu regular (art 74), hetan fiar ba kna’ar atu hametin unidade nasionál liuhosi hametin diálogu ida-ne’ebé saudável entre forsa polítika oin-oin iha país ida-ne’e.

“Dudu komunikasaun ida onesta (jujur), transparente no justa entre líder sira partidu nian no líder sira nasaun nian no halo ho forma ida imaparsiál no ho respeitu boot ba konstituisaun no lei sira-ne’ebé estadu demokrátiku. Hosi repúblika demorátika ida-ne’e nian iha no hafoun tán konfiansa ba povu katak atu promove jutisa, moris di’ak sosiál no ekonómika hodi garante moris dignu no umanu ema hot-hotu nian,” bankada PD propoin ba Xefe Estadu.

Pontu daruak ne’ebé Bankada Demokrátiku propoin mak atu deputadu lejizlatura ida-ne’e nian hahú komunikasaun, hamenus deklarasaun sira-ne’ebé desfavorável no tendensioza no desenvolve vokabulariu polítiku sira-ne’ebé ho koriz demokrátiku, Konsiliadór atu promove entendimentu hodi nune’e hamutuk defende interese aas povu nian.

Tanba povu hakarak tebes atu hetan moris ida dignu ho asesu ne’ebé di’ak ba saúde, edukasaun, bee-moos, ai-han nutritivu no mós iha estrada ne’ebé di’ak, eletrisidade atu hasai sira hosi izolamentu sosiál ne’ebé halo sira sai ki’ak no la hetan de’it moris ida-ne’ebé dignu no umanu.

Bankada PD rekomenda ba Governu atu ukun povu hotu-hotu no halo mákina estadu nu’udar instrumentu atu serví hotu-hotu ho direitu atu serví, hodi hasees no halakon partidarizasaun funsionalizmu públiku no nia servidór sira estadu nian.

“Ba tribunál atu hala’o didi’ak justisa hodi garante duni justisa ba sidadaun hotu no labele halo diferensa hosi klase sosiál, estatutu ne’ebé mak ema-ida hetan no mós atu hasees ho tendénsia polítika hosi hahalok persegisaun injusta ba individu motivadu sira ho razaun emosaun relasionamentu ne’ebé lori atu estraga konfiansa sidadaun sira-nian ba órgaun ida-ne’ebé iha méritu aas,” Bankada PD fó hanoin ba tribunál.

Xefe Bankada PD ne’e relembra, istória luta ba independénsia hetan louvor aas tanba forsa mak ita-nia unidade, determinasaun no persisténsia líder sira-nian, vontade atu halo sakrifísiu no mós hakarak sakrifika  no eroisidade aas mártir sira-ne’ebé monu ona no mos eroisidade nonook povu nian ne’ebé labele nega.

“Ne’e hotu mak memoria furak ne’ebé rejista ona iha ita-nia istória luta. Luta ne’ebé ema uain halo ho hakarak duni atu defende independénsia hanesan fim atu liberta pátria. Ohin, ita moris buat sira-ne’ebé ita deve hosi pasadu, sakrifísiu, kosar, raan, isin mate iha luta, rate lahetan, viúvas lubun ho nonok hela no laiha konsolasaun maibé iha haluhan. Misaun ne’ebé ita hakarak sein dook loos ne’ebé ita ladauk kumpre: libertasaun povu. Liberta povu signifika halo buat di’ak, fó oportunidade atu sira hala’o moris di’ak moris nian iha uma kain ida-daik nian,” Xefe Bankada PD, António da Conceição hateten.

 Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here