Otelio Ote. Imajen/Facebook: Sico Gari Namkari.

DILI, 15 setembru 2020 (TATOLI)—Conselho de Imprensa (CI), ohin, realiza konferénsia hodi hili mídia na’in sira bele reprezenta órgaun komunikasaun sosiál iha Conselhu de Imprensa ba períodu 2020-2024 ne’ebé hala’o iha Salaun Delta Nova, Dili.

Notísia RelevanteMídia na’in husu CI rezolve problema entre CI ho mídia boot sira

Iha konferénsia refere, mídia na’in sira aprezenta pakote tolu no liuhosi eleisaun mak konfrensista sira hili Otelio Ote hosi Dili Weekly hodi reprezenta órgaun komunikasaun sosiál iha Conselho de Imprensa ho votu neen (6), hosi kandidatu na’in rua seluk Raimundo Oki ho votu tolu (3) no José Maria Ximenes ho votu haat (4).

Hosi pakote tolu ne’e, kandidatu Otelio Ote ho nia proponente na’in-tolu (3) mak hanesan Dili Post, RTTL no TVE, kandidatu Raimundo Oki ho nia proponente hamutuk na’in-tolu (3) mak Time Timor, Lafaek ho Naunil, no kandidatu José Ximenes ho nia proponente hamutuk na’in-tolu (3) mak hanesan TATOLI, Time Timor no Dili Post.

Iha biban ne’e, Otelio Ote hateten, presiza hamutuk ho mídia na’in sira atu eleva kualidade instituisaun mídia no kualidade jornalizmu iha Timor-Leste.

“Ho ida ne’e presiza servisu hamutuk ho mídia na’in sira hodi oinsa bele eleva mídia, liuliu kualidade instituisaun no kualidade jornalizmu enjeral,” dehan Otelio Ote, ba jornalista sira iha salaun Delta Nova, Comoro, Dili, tersa ne’e.

Nu’udar reprezenta mídia na’in iha CI, nia dehan, dahuluk mak halo konsolidasaun organizasaun iha laran. Tanba, nia dehan, ema hotu hatene katak sei mosu ho ema foun na’in-rua (2) ka tolu (3) no hein tan hosi Parlamentu Nasionál depois konsolida iha laran hotu.

“Ho ida-ne’e, ha’u sei halo aprosimasaun ho mídia no jornalista hotu hodi hamutuk atu koko renova fali karater hanoin foun ida katak komunidade mídia tenke sai ida de’it. Labele halo ida fali mídia kiik no ida fali mídia boot ka mídia profesionál, ne’e labele. Tanba ne’e, presiza kontribui ema hotu nia partisipasaun,” Otelio Ote hateten.

Nia dehan, CI la’ós fatin permanente maibé CI hanesan fatin konsellu no komisariu hodi hamutuk no kontribui ba dezenvolvimentu mídia nian iha Timor-Leste. Tanba ne’e, nia hakarak kontribui makaas iha mídia no prontu atu servisu hamutuk ho mídia na’in sira ka organizasaun sosiedade sivíl sira hotu.

Mídia na’in sira, tuir nia, iha duni kompromisiu hodi kontinua hili sira-nia reprezentante ba órgaun independente ne’e. Tanba ne’e, nia agradese ba partisipasaun mídia na’in sira hotu ba konferénsia ne’ebé mak hodi hili nia sai reprezentante mídia na’in iha CI ba periódu 2020-2024.

Mídia na’in sira ne’ebé marka prezensa hodi tuir konferénsia refere mak mídia na’in hamutuk 13. Mídia na’in sira ne’ebé partisipa mak TATOLI,I.P,  RTTL,E.P, Dili Post, Time Timor, Dili Weekly, Naunil, M3 Rádiu, Rádiu Vós, Multimédia, TVE no Gardamor TV.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here