Ministru Prezidénsia Konsellu Ministru, Fidelis Manuel Leite Magalhães. Imajen Tatoli/Egas Cristovão

DILI, 15 setembru 2020 (TATOLI)-Tuir kalendáriu, tersa  (15/09), VIII Governu Konstitusionál sei submete proposta Lei Orsamentu Jerál Estadu (OJE) 2020 ba Parlamentu Nasionál (PN).

“Ami prepara ona atu Ministru Asuntu Parlamentár no Komunikasaun Sosiál no Ministru Finansa maka atu lori proposta Orsamentu 2020, ohin tuku 15:00, mai iha parlamentu Nasionál no tuir kalendáriu sei aprezenta tan OJE 2021 iha 15 outubru,” tenik  Ministru Prezidénsia Konsellu Ministru, Fidelis Manuel Leite Magalhães, iha Parlamentu Nasionál, tersa ne’e.

Tuir governante ne’e, Proposta Lei OJE 2020 ho montante totál biliaun $1,497 atu kobre nesesidade ba programa no prioridade nasionál ne’ebé VIII Governu Konstitusionál define ona, liuliu iha nível estabilizasaun setór sosiál no ekonómiku, inklui prosesu reforma institusionál hirak ne’ebé hala’o daudaun.

Nune’e, Iha loron 29 juñu, Konsellu Ministru estraorinária aprova ona tetu OJE 2020 ho valór biliaun $1,492,3, maibé tanba iha ajustamentu balun maka montante ne’e sa’e oituan ho aumentu millaun $1,49 sai biliaun $1,497.

Notísia Relevante: Governu Aprova Tetu Proposta OJE 2020 Millaun $1.492,3, Loron 15 Setembru Submete ba PN

Tetu OJE 2020 ho montante billaun $1,497, fahe ba kategoria saláriu no vensimentu millaun $206,8, bens no servisu millaun $496,7, tranferénsia públika millaun $571,1, kapitál menór millaun $8,9, akapitál dezenvolvimentu millaun $213,4.

Orsamentu 2020 maihosi reseita doméstika millaun $172,3, hosi rendimentu sustentável estimadu (RSE) millaun $544,3 sai millaun $316,6, tanba osan la to’o (défise) foti exesu hosi fundu mina-rai millaun $477 liu RSE, no totál levantamentu hosi fundu mina-rai hamutuk billaun $1,011.3.

Entretantu, proposta tetu Orsamentu Jerál Estadu (OJE) 2020 ne’ebé Konsellu Ministru aprova ona sei inklui mós gastu Dotasaun Orsamentu Temporáriu (DOT) durante fulan-10 nian.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here