Sesaun Plenária Iha Parlamentu Nasionál. Imajen Tatoli/ Egas Cristóvão

DILI, 15 setembru 2020 (TATOLI)—Prezidente Parlamentu Nasionál Deputadu Aniceto Longuinhos Guterres Lopes, hateten kualidade komunikasaun entre líder partidu polítiku (parpol-red) sira mak forma konjuntura polítika iha uma fukun Parlamentu Nasionál.

Notísia RelevantePR konsidera bankada CNRT retira hosi plenária ne’e problema PN nian

Diskursu Aniceto Longuinhos Guterres Lopes iha ámbitu reuniaun plenária solene ba abertura sesaun datoluk Kinta Lejislatura nian, hateten Povu mak na’in ba demokrasia, povu mak soberania no podér polítiku nia hún.

Nia dehan, liuhosi dmokrasia mak ita konstroi podér politiku no hametin ita-nia soberania, liuhosi demokrasia mak halo alternánsia ba ukun-na’in sira iha organizasaun podér polítiku iha Timor-Leste.

“Dinámika demokrasia iha Timor-Leste, povu nia vontade polítika no kualidade komunikasaun entre líder partidu polítiku mak forma konjuntura polítika iha Parlamentu Nasionál no iha Governu. Faktu hatudu katak hosi tinan 2007 to’o 2018 laiha eleisaun parlamentár ida-ne’ebé rezulta partidu polítiku ida mesak atinje maioria absoluta,” Aniceto Guterres iha Plenária Parlamentu Nasionál, tersa ne’e.

Nia subliña, realidade ida-ne’e marka konjuntura polítika únika ida iha Parlamentu no iha Governu durante jornada konstrusaun Estadu no governasaun iha Timor-Leste iha tinan 20 nia laran.

“Parlamentu ho opozisaun aprlamentár no ho insidénsia parlamentár, ita iha Governu ho maioria absoluta, iha Governu ho koligasaun maioria. Situasaun hirak ne’e hatudu katak sosiedade Timor-Leste halo hela teste no kontesta rasik nia vontade no opsaun polítika, figura eminente no ba jerasaun  kontinuadora sira katak komunikasaun nu’udar elementu esensiál iha nível kategoria hotu-hotu, hodi asegura kontinuidade lideransa estadu no governasaun ne’ebé sustentável no sólidu,” Aniceto Guterres haktuir. 

Prezidente Parlamentu Nasionál ne’e hateten, partidu polítiku sira buka-malu no komunika ba malu ho haraik-aan hodi konserta entendimentu kona-ba interese nasionál.

“Ida-ne’e fó hanoin kedas katak komunikasaun ka diálogu entre líder partidu polítiku sira, nu’udar etapa indispensável ida, depois hetan tiha rezultadu eleisaun. Komunikasaun mak dalan hodi hetan entendimentu no konsensu, hodi reforsa sentidu Estadu no materializa konfiansa ne’ebé povu fó ba partidu sira hodi organiza no orienta dezenvolvimentu ba povu tomak nia prosperiedade”, akresenta Prezidente Parlamentu Nasionál,” esplika.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here