Família saudozu Faustino dos Santos ‘Renan Selak’ iha seremónia funebre, iha osuáriu no semitériu espesiál Lautém, tersa (15/09). Imajen Tatoli/Eugênio Pereira

LAUTÉM, 15 setembru 2020 (TATOLI)-Prezidente Repúblika (PR), Francisco Guterres ‘Lú Olo’, hateten Estadu halo ona lei atu fó onra no tau-matan ba kombatente ne’ebé sei moris no ba sira ne’ebé mate ona, Estadu buka ajuda faluk no oan-kiak sira.

“Iha 28 novembru 2018, ha’u kondekora saudozu Renan Selak ho grau aas Kolár Ordem Timor-Leste ho Dekretu Prezidente númeru 46/2018. Ba oin, Estadu sei tau-matan nafatin ba família saudozu liuhosi pensaun sobrevivénsia no benefísiu tuir lei haruka,” mensajen Xefe Estadu ne’ebé hato’o hosi Xefe Kaza Sivíl, Francisco Vasconselhos, iha seremónia funebre saudozu Faustino dos Santos ‘Renan Selak’, iha osuáriu no semitériu espesiál Lautém, tersa ne’e

PR Lú Olo dehan, Renan Selak nu’udar erói nasionál koñesidu ida, enkuantu sei moris simu rekoñesementu hosi Estadu ho dereitu hotu tuir Lei haruka nu’udar veteranu tinan 24.

“Ho laran taridu, ha’u hato’o mensajen ba seremónia haloot ba ita-nia saudozu, ha’u-nia kompañeiru brani ida no veteranu luta libertasaun nasionál,” tenik Xefe Estadu.

Prezidente Repúblika dekreta ba dahuluk hakoi veteranu ida hosi Lautém iha semintériu espesiál ida.

“Haloot ona restu mortál sira, nune’e bele dekansa hakmatek ho Lautém-oan sira ne’ebé mate mós ba ita hotu nia kauza nasionál. Ha’u hein katak iha tempu badak fatin sei hanaran jardim dos herois da patria Lautém”.

Nia nota katak saudozu ne’e husik hela knaar importante iha Konsellu Kombatente Libertasaun Nasionál (CCLN, sigla portugés) nu’udar Vise-Prezidente, ne’ebé harii iha janeiru 2020 atu organiza no tau-matan ba kombatente libertasaun nasionál hotu.

“Ha’u-nia kompañeiru no irmaun veteranu ida maka mate, nia la’o ho ami ho dignidade no korajen boot tebes iha luta ukun rasik-an. Ami hakat maluk sira-nia isin ne’ebé monu iha sorin-sorin, maibé nia hatene nakfilak hosi laran taridu ba fali korajen ho determinasaun atu la’o to’o rohan. Ami fiar povu sei ukun rasik-an tanba halo ona jornada naruk tebes, simu sakrifísiu no terus oinoin hodi ita hotu bele moris ho dignidade ohin loron,” Lú Olo subliña.

Xefe Estadu konsidera maski saudozu la hambriik iha faze daruak luta liberta povu no dedika-an ba kauza nasionál maibé sei nafatin inspira ba jerasaun hotu.

“Ita sente triste tanba nia mate, maibé nia obra hanesan funu-na’in sei nafatin iha tanba hanesan orgullu ba povu no jerasaun hotu hodi hamutuk hatutan nia mehi no ita hotu nia mehi atu liberta povu hosi ki’ak no mukit. Ba família tomak saudozu nian, ha’u hato’o hakuak boot no ksolok,” PR hatutan.

Hafoin hato’o mensajen Estadu, Xefe Kaza Sivíl entrega mensajen ne’e ba saudozu Renan Selak nia oan mane, Norberto dos Santos.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here