Prezidente Repúblika, Francisco Guterres Lú Olo, bainhira halo diskursu iha toma pose membru foun VIII Governu Konstitusionál. Sesta, 29-5-2020. Imajen António Gonçalves

DILI, 15 setembru 2020 (TATOLI)— Prezidente Repúblika (PR), Francisco Guterres “Lú Olo”, hateten bankada parlamentár ida monu la determina Governu tenke monu tanba prosesu hamonu Governu tenke la’o tuir rekizitu no sirkunstánsia tama iha artigu 112 hosi Konstituisaun Repúblika.

Notísia RelevantePR Lú Olo loke ona sesaun lejislativa foun ba lejislatura dalima  

Xefe Estadu esplika, ema hotu tenke konsiente katak, hafoin Governu ida harii, tuir Konstituisaun RDTL haruka, nia iha autonomia polítika hodi hala’o ninia knaar nu’udar Órgaun Ezekutivu.

“Bainhira maioria parlamentár ida muda, ida-ne’e la determina katak Governu tenke  monu ka tenke  harii kedas Governu foun ida. La determina ida-ne’e tanba prosesu hamonu Governu tenke la’o tuir rekizitu no sirkunstánsia tama iha artigu 112, hosi Konstituisaun Repúblika. Artigu ne’e hatete katak Governu monu bainhira Parlamentu Nasionál la aprova votu konfiansa ka bainhira aprova mosaun sensura,” Xefe Estadu ko’alia asuntu ne’e liuhosi sesaun lejizlativa datoluk ba lejizlatura dalima iha Parlamentu Nasionál, tersa ne’e.

Prezidente Repúblika fundamenta, dispozisaun konstitusionál ida-ne’e fó protesaun ba Governu nia autonomia polítika relativa tanba define loloos kauza no oinsá bele demite Governu.

Hafoin haree katak buat ruma akontese iha kontestu  ida-ne’e, Prezidente Repúblika bele foti desizaun relasiona ho demisaun Governu tuir pontu  n.° 2 hosi artigu 112.

Iha fulan-Dezembru 2019, Primeiru-Ministru dada-sai fali proposta Orsamentu Jerál Estadu ba 2020 ne’ebé hatama tiha ona ba  debate iha Parlamentu Nasional, no  iha fulan-Janeiru tinan 2020 hatama fali proposta foun ida.

Dada fali proposta dahuluk no proposta daruak Orsamentu Jerál Estadu  la pasa,  iha 17 Janeiru 2020, la implika katak Konstituisaun Repúblika fó ona dalan atu demite Governu ka disolve Parlamentu Nasionál, maski lala’ok polítiku rua ne’e relevante tebes.

Tanba proposta Orsamentu Jerál Estadu la pasa, mosu hanoin ne’ebé konsidera katak rejeisaun ne’e bele ona lori Prezidente Repúblika atu  disolve Parlamentu Nasionál.

“Ha’u hakarak haklaken katak faktu ne’e de’it la obriga Prezidente Repúblika atu disolve Parlamentu Nasionál.  Ita haree momoos katak faktu ida-ne’e la hamosu krize institusionál grave tanba VIII Governu hala’o nafatin ninia knaar hanesan baibain,” Xefe Estadu ne’e dehan.

Nune’e mós Konstituisaun fó dalan ba Governu  atu hatama fali proposta lei Orsamentu Jerál Estadu foun ida durante sesaun lejislativa hanesan, biar proposta ida uluk la pasa. Importante fó-hanoin mós katak Parlamentu Nasionál hala’o nafatin ninia knaar baibain tuir  Konstitusaun.

Nia hatutan, Governu sei iha hela oportunidade atu hatama proposta Orsamentu Jerál Estadu 2020 ba Parlamentu Nasionál, hodi troka rejime duodésimu ne’ebé la’o daudaun. Rejime duodésimu sei hapara bainhira, tuir lei,  ita hahú uza Orsamentu Jerál Estadu 2020 nune’e jestaun orsamentu ba fulan tolu ikusliu,  tinan ida-ne’e nian, bele la’o hanesan baibain.

“Orsamentu 2020 sei kobre despeza hotu-hotu  hosi  kedas 01 Janeiru 2020 no nune’e hatuir rekizitu kontabilista no legál ne’ebé relasiona ho nia karáter anuál. Hanesan ne’e, tuir lei, despeza ba kapitál dezenvolvimentu no sira seluk tan bele hala’o ona no  la hetan sátan hosi  regra sira ne’ebé tama iha rejime duodésimu. Kompete ba Governu atu ezekuta Orsamentu ne’e ho di’ak,” nia hateten. 

Bazeia ba ninia Programa ne’ebé hetan ona aprovasaun hosi Parlamentu Nasionál, VIII Governu Konstitusionál iha devér atu hato’o proposta Lei Orsamentu Jerál Estadu nian ba tinan 2021.

Proposta-Lei Orsamentu Jerál ba Estadu, ba tinan oin,  tenke la’o tuir Konstituisaun Repúblika hateten kona-ba prosesu aprovasaun Orsamentu Jerál Estadu no tanba ne’e tenke  hatama iha Parlamentu Nasionál to’o 15 outubru tinan ida-ne’e nian.

Hafoin hanoin kle’an ba pozisaun polítiku-partidária sira-ne’ebé fó-sai ba públiku,  hahú hosi  Janeiru  2020, Prezidente Repúblika haree katak iha ona kondisaun atu promove diálogu hodi hakotu krize polítika ne’ebé mosu tanba Orsamentu Jerál Estadu 2020 la pasa iha Parlamentu Nasionál.

Ho nune’e mak hahú prosesu polítiku ida hodi buka solusaun sira-ne’ebé bele garante estabilidade no fó dalan ba kompleta  estrutura Governu.

Tanba VIII Governu Konstitusionál hala’o hela ninia knaar tuir Konstituisaun Repúblika haruka no presiza asegura governasaun ida-ne’ebé efetivu, liuliu tanba hasoru mós pandemia COVID-19, Prezidente Repúblika hili  fó dalan ba VIII Governu Konstitusionál no Primeiru-Ministru atu hatutan nafatin sira-nia knaar.

“Dalan  ne’e la viola Konstituisaun RDTL. Haree ba sirkunstánsia hotu-hotu, desizaun polítika ida-ne’e, tama iha kompeténsia sira-ne’ebé artigu 74 Konstituisaun Repúblika fó ba Prezidente Repúblika,” Xefe Estadu ne’e dehan.

Xefe Estadu hateten, faktu ida ne’ebé akontese duni mak  maioria parlamentár foun ida-ne’ebé harii ho partidu PLP, KHUNTO no FRETILIN,  bele ona garante kontinuidade no fó lejitimidade ba VIII Governu.

Prezidente Repúblika hein katak VIII Governu Konstitusionál sei metin nafatin to’o nia mandatu ramata iha tinan 2023.

Tanba ne’e,  importante tebes ba  partidu hotu-hotu ho asentu parlamentár,  atu  hala’o diálogu ho laran moos no nakloke, hodi buka solusaun hirak ne’ebé bele garante kontinuidade no estabilidade ba Governu hodi bele hala’o ninia knaar hodi hadi’ak  ita-nia Povu nia moris.

“Ita labele lakon tan tempu. Importante no urjente tebes fó benefísiu ba ita-nia Povu ho rekursu sira ne’ebé ita-nia rain iha,” xefe estadu esplika.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here