Prezidente Repúblika, Francisco Guterres ‘Lú-Olo’ hamutuk ho Prezidente Parlamentu Nasionál, Aniceto Guterres Abertura Da-Tolu Kinta Ligislatura iha Sesaun Plenária Iha Parlamentu Nasionál. iha PN. tersa (15/09). Imajen Tatoli/ Egas Cristóvão

DILI, 15 setembru 2020 (TATOLI)—Bankada Congresso Naconal da Reconstrução Timorense (CNRT) walk out (sai) hosi plenária Parlamentu Nasionál iha ámbitu reuniaun plenária solene ba abertura sesaun datoluk Lejislatura dalimak nian.

Notísia RelevantePR Lú Olo fiar OJE 2020-2021 sei pasa iha PN

Bankada CNRT deside pozisaun ne’e hafoin hakotu halo intervensaun kona-ba plenária solene ba abertura sesaun datoluk Lejislatura dalimak

“Atu hakotu ho respeitu ami-nia hako’ak ba militante tomak no ba Povu ne’ebé sei fiar ba Maun Bo’ot Kay Rala Xanana Gusmão no Partidu CNRT. Ho nune’e, ami husik hela fatin ida-ne’e (plenária),” Vise-Xefe Bankada CNRT, Deputadu Patrocínio dos Reis Fernandes, informa liuhosi plenária Parlamentu Nasionál, tersa ne’e.

Vise-Xefe Bankada CNRT ne’e fundamenta, bankada refere deside sai hosi plenária tanba kestiona legalidade meza prezidénsia Parlamentu Nasionál no prosesu formasaun Governu.

“Ohin mós ami hatio’o ona mai-nia pozisaun hosi nai Prezidente Repúblika rona direta,” nia dehan. 

Iha V Lejizlatura, ba sesaun lejizlativa datoluk ne’e, Bankada CNRT iha oportunidade atu bele hato’o diretamente ba Na’i Prezidente Repúblikadala barak ona, hato’o hosi meiu komunikasaun oin-oin maibé seidauk hetan esplikasaun direta hosi Na’i Prezidente Repúblika.

Vise-Xefe Bankada CNRT ne’e haktuir, públiku tomak akompaña katak iha loron 25 Juñu 2020 liubá, Prezidente Repúblika, Francisco Guterres Lú Olo, fó-pose ba Membrus VIII Governu, Governu ida-ne’ebé, atual Primeiru Ministru, Taur Matan Ruak, deklara ba públiku, iha Janeiru 2020. Katak, Prezidente Repúblika rasik maka sobu tiha Governu nia roda-ida, Primeiru-Ministru hasai kadeira, no CNRT maka fakar minarai no sunu tiha karreta ne’e.

“Perguntas maka ne’e, oinsá mak kaereta ida ne’ebé Prezidente Repúblika sobu tiha nia roda, Primeiru-Ministru sobu nia kadeira, no CNRT sunu tiha ona… bele  teki-teki kareta ne’e nia roda kompletu fali de’it,” nia kestiona. 

Deputadu Patrocínio hateten, bainhira liga analojia karreta ba iha Konstituisaun Repúblika, iha-ne’e Primeiru-Ministru fó mensajen klara katak formasaun VIII Governu ne’e mai hosi Aliansa Mudansa ba Progresu tuir Konstituisaun, artigu 106 (al.1), liuhosi nomeia Primeiru-Ministru ba VIII Governu nian.

Maibé, Prezidente Repúblika maka sobu tiha roda ida, tanba rekuza atu fó-pose ba membru Governu sira hodi kompleta formasaun Governu nian no ikus mai karreta ne’e labele la’o, to’o ahi haan tiha de’it.

Vise-Xefe Bankada CNRT n’e argumenta, razaun hirak ne’e mak bankada refere deside sai hosi plenária molok Prezidente Repúblika, Francisco Guterres “Lú Olo” hato’o nia diskursu iha ámbitu reuniaun plenária solene ba abertura sesaun datoluk Lejizlatura dalima.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here