Ró Haksolok. Imajen/Dok. ZEESM

DILI, 15 setembru 2020 (TATOLI)-Prezidente Autoridade (PA) Rejiaun Administrativu Espesiál Oé-cusse Ambeno (RAEOA) no Zona Ekonomia Espesiál Sosiál Merkadu, Timor Leste (ZEESM,TL), Arsénio Paixão Bano, informa Governu sentrál fó ona kompeténsia ba autoridade atu kontinua prosesu ró Haksolok no finaliza konstrusaun hodi lori mai iha Timor-Leste tinan oin.

“Tinan 2021, ha’u hein katak ró ne’e bele mai tanba ami kria kondisaun balun ba empreza privada ho kapitál apoiu porsentu 100 hosi RAEOA atu kontinua halo segimentu ba ró Haksolok, ha’u fiar katak situasaun ne’e ami bele kontrola no laiha problema,” tenik Prezidente PA Arsénio resintu Parlamentu Nasionál, tersa ne’e.

Maski nune’e, Arsénio Bano, husu nafatin apoiu hosi  Governu sentrál  no Eis Prezidente PA Marí Alkatiri tanba komprende liu prosesu.

“Kompañia iha problema ho finaseiru ka bankarota, entaun Autoridade  RAEOA-ZEESM reprezenta Estadu Timor-Leste tenta kaer metin konstrusaun ró haksolok iha ita-nia kontrolu no asegura ró bele mai nafatin,” nia akresenta.

Daudaun ró ne’e iha sidade Figueirra da Voz, Portugál, tanba iha problema kapasidade finanseira kompañia Atlantic Eagle Ship Building, ne’ebé hanesan responsável ba konstrusaun ró-ahi Haksolok.

Ró ne’e ho kustu millaun €13,7, inaugura iha loron 26 maiu 2017 iha sidade Figuerra da Foz, Portugál no tuir informasaun sei to’o iha outubru 2017, maibé tanba problema internál kompañia ho sub-kontratór maka to’o agora ró seidauk mai.

Ró Haksolok iha kapasidade atu tula ema na’in-377 no karreta hamutuk 15.

Enkuantu, prosesu konstrusaun ba ró, ninia kontratu asina iha 2014 entre Governu no empreza portugés, no kontrusaun konsege paradu maibé bainhira estabelese ZEESM, prosesu konstrusaun ró-ahi ne’e entrega ba autoridade RAEOA maka responsabiliza.

Desizaun atu hili ninia estaleiru (fatin atu harii ró) hahú ho foti husi V Governu Konstitusionál ne’ebé lidera hosi Kay Rala Xanana Gusmão nu’udar Primeiru-Ministru, tuir ninia reprezentante hosi Ministru Transporte no Komunikasaun, Pedro Lay da Silva, ne’ebé selebra kontratu ho estaleiru Atlantic Eagle ship Building, Lda iha loron 22 setembru 2014.

RAEOA-ZEESM simu prosesu konstrusaun ró liuhosi transferénsia projetu no alokasaun orsamentu husi Governu sentrál ba autoridade hodi transfere podér no alokasaun verba ne’ebé akontese entre Governu no Estaleiru Atlantic Eagle ship Building.

Atu garante implementasaun tuir espesifikasaun no padraun tékniku ba ferry ró Haksolok no asegura katak bele hetan rejistu internasionál tuir rekezitu Governu Timor-Leste, maka RAEOA-ZEESM selebra kontratu supervizaun ba konstrusaun ferry ho instituto soldadura e Qualidade (ISQ) ne’ebé hanesan instituisaun ho esperiénsia liu tinan 50 ho konstrusaun ne’ebé kredensiál atu fiskaliza konstrusaun.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here