Prezidente Parlamentu Nasionál, Aniceto Longuinhos Guterres Lopez.

DILI, 15 setembru 2020 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes, rekoñese mandatu iha lejzilatura dalimak ne’e todan liu kompara ho mandatu anteriór.

Notísia RelevantePR konsidera bankada CNRT retira hosi plenária ne’e problema PN nian

“Dezentendimentu no diverjénsia pozisaun polítika  hamutuk ho pandemia COVID-19 no sira-nia impaktu ba povu nia moris sosiál no ekonómiku halo mandatu ida-ne’e todan liu tinan hirak liubá. La’ós mai ha’u de’it nu’udar Prezidente Parlamentu maibé ba Deputadu idak-idak, ba partidu sira ho asentu iha parlamentu no ba Parlamentu Nasionál nu’udar órgaun kolejiál ne’ebé reprezenta povu tomak,” Aniceto Guterres, informa liuhosi ámbitu solene ba abertura sesaun datoluk Lejizlatura dalimak iha plenária Parlamentu Nasionál, tersa ne’e.

Aniceto Guterres fundamenta, Parlamentu Nasionál nu’udar fatin sentrál ba atividade polítika, fatin ba desizaun boot estadu nian, fatin ba konjuga vontade, hanoin kona-ba dezenvolvimentu nasionál, enkuadramentu Timor-Leste iha konvivénsia rejionál no internasionál.

Tanba ne’e, nia dehan, Parlamentu Nasionál tenke sai fatin ba komunikasaun ka diálogu, fatin ba debate franku (franco) no onestu ho sentidu Estadu no sentidu Altroizmu ba interese nasionál.

Nune’e mós Parlamentu Nasionál bele sai fatin ba rekonsiliasaun hodi konsentra esforsu ba interese komún, ba konsolidasaun estadu direitu demokrátiku, estabilidade no prosperiedade nasionál.

“Konsentrasaun esforsu hirak ne’e presiza enkuadra nafatin iha podér lejizlativu, podér desizaun polítika no podér fiskalizadora ne’ebé Konstituisaun atribui ba Parlamentu Nasionál.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here