Prezidente Autoridade RAEOA-ZEESM,TL, Arsénio Paixão Bano. Imajen Tatoli/António Gonçalves

DILI, 15 setembru 2020 (TATOLI)-Prezidente Autoridade (PA) Rejiaun Administrativa Espesiál Oé-cusse Ambeno (RAEOA) no Zona Ekonomia Espesiál Sosiál Merkadu, Timor Leste (ZEESM,TL), Arsénio Paixão Bano, hateten presiza akumula forsa atoni-oan sira hodi apoia prevene kontájiu surtu COVID-19 mai Timor-Leste tanba nasaun viziñu Indonézia sei rejista númeru aas ba vírus ne’e.

“Ami serbisu hamutuk ho populasaun atu halo prevensaun liuhosi sensebiliza informasaun atu hadook-an hosi kontájiu surtu COVID-19, liuliu hapara movimentu ilegál iha fronteira terrestre hodi kumpre nafatin prosedimentu ka regra sanitáriu husi Organizasaun Mundiál Saúde (OMS) no Ministériu Saúde (MS),” tenik PA Arsénio iha resintu Parlamentu Nasionál, tersa ne’e.

Dadaun ne’e, RAEOA rejista ema na’in-30 mak iha konfinamentu obrigatóriu no seidauk rejista kazu positivu COVID-19 iha Oé-cusse.

Maski nune’e, Arsénio rekoñese iha movimentu ilegál  iha fronteira terrestre hanesan área Sakato, Oe-silo, Pasabe no Citrana, tanba ne’e deside ona halo aprovizionamentu atu harii kuaretena no aumenta fasilidade saúde sira iha pontu entrada sira ne’e.

Autoridade RAEOA halo ona rekrutamentu ba pesoál saúde atubele haree no kontrola iha fatin izoladu sira hanesan Bi-Ili iha área Citrana nian no área Banafe, ne’ebé deskonfia iha movimentasaun entre komunidade Oé-cusse no Indonézia.

“Ema ilegál tama beibeik, maibé sira tama ona ba kuarentena no ami apela ona ba komunidade bainhira sira tama ilegál to’o tama kuarentena dala-tolu, sira rasik maka sei selu kuaretena, hafoin detein durante oras 72 tanba kontra ordém públika no bele fó  perigu ba saúde públika iha Oé-cusse no Timor-Leste,” nia apela.

Nune’e, nia husu ba Atoni-oan atu tuur hakmatek iha uma no labele halo movimentasaun iha iha pontu entrada sira tanba kapasidade iha ospitál no sentru saúde iha RAEOA mínimu tebes.

Aleinde ne’e, Autoridade RAEOA mós koopera ona ho MS no Ministériu Negósiu Estranjeiru no Kooperasaun (MNEK) atu sidadaun ne’ebé hakarak tama ba Oé-cusse tenke liuhosi fronteira Batugade no Aeroportu Dili.

“Ami Oé-cusse la simu sidadaun husi liu’ur, tanba ami laiha kapasidade fasilidade saúde sufisiente, bainhira atu tama kuarentena mak tama ba Oé-cusse,” nia subliña.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here