Prezidente Asosiasaun TANE Konsumidór, António Ramos da Silva ‘Naikoli’. Imajen Tatoli/Antónia Gusmão

DILI, 14 setembru 2020 (TATOLI)–Asosiasaun TANE Konsumidór hamutuk ho parseiru dezenvolvimentu Uniaun Eupeia (UE) fahe broxura ba estudante Universidade Nacional Timor Lorosa’e (UNTL), Departamentu Komunikasaun Sosiál, kona-ba problema konsumu hosi konsumidór sira.

Prezidente Asosiasaun TANE Konsumidór, António Ramos da Silva ‘Naikoli’, hateten objetivu fahe broxura ne’e hanesan hatuur ona iha Lei númeru 8/2016, hodi fó protesaun ba konsumidór no iha artigu 8 ne’ebé mensiona formasaun no edukasaun ba konsumu.

“Tanba ne’e, asosiasaun iha inisiativa hodi hala’o sosializasaun ba konsumidór nia direitu no buka dalan hodi rezolve bainhira hetan problema iha konsumu. Atividade ohin hanaran TANE ba laran no TANE sai ba li’ur, ho objetivu atu hakbesik liu ba konsumidór sira, fó formasaun no promove kona-ba direitu no devér nu’udar konsumidór nian,” tenik Prezidente Asosiasaun TANE Konsumidór, iha Departamentu Komunikasaun Sosiál UNTL, Caicoli, segunda ne’e.

Nia rekoñese, TANE iha sikun ida katak konsumidór sira seidauk hatene didi’ak direitu iha konsumu tuir realidade iha Timor-Leste.

“Dalaruma konsumidór sira mós seidauk hatene ka seidauk iha informasaun kona-ba oinsá maka halo reklamasaun ba keixa ruma bainhira hetan buat balun laloos iha konsumu,” nia akresenta.

Tanba ne’e, atu promove direitu konsumidór sira-nian, TANE hili UNTL halo sosializasaun tanba komersiante sira mós seidauk iha informasaun ne’ebé kle’an kona-ba obrigasaun no direitu konsumidór nian.

Naikoli konsidera liuhosi sosializasaun ne’e, estudante sira bele transmite ba família ka komunidade kona-ba direitu no devér konsumidór ninia.

“Loron-loron ita hasoru problema maka kona-ba konsumu ba ai-han, komunikasaun, eletrisidade, no atendimentu públiku, tanba ne’e maka tenke sosializa atu konsumidór sira bele hatene sira-nia direitu no devér, nune’e ita bele uza meiu ida hanesan TANE Konsumidór atubele hato’o keixa hodi hetan informasaun kona-ba situasaun konsumu nian,” nia subliña.

Durante ne’e asosiasaun ne’e identifika ona problema barak hanesan área komunikasaun, Eletricidade de Timor-Leste (EDTL), folin sasán no garantia produtu.

“Problema sira ne’e balun rezove ona no balun sei iha prosesu nia-laran, nune’e TANE Konsumidór servisu nafatin atu defende direitu konsumidór sira ne’ebé konsagra iha ita-nia Konstituisaun no mós lei ba protesaun konsumidór, tanba ne’e hanesan direitu fundamentál ba konsumidór sira hotu,” nia haktuir.

Sorin seluk, Dekanu Fakuldade Siénsia Sosiál UNTL, Camilho Ximenes, agradese ba asosiasaun konsumidór ne’e tanba bele fahe informasaun kona-ba ba konsumidór sira-nia direitu, atu buka dalan rezolve bainhira hetan problema iha konsumu.

Jornalista: Antónia Gusmão
Editora: Julia Chatarina

HAKEREK NO HATÁN

Please enter your comment!
Please enter your name here