Ministru Asuntu Parlamentár no Komunikasaun Sosiál, Francisco Jerónimo. Imajen Tatoli/Egas Cristovão

DILI, 14 setembru 2020 (TATOLI)-Iha ámbitu ajustamentu tetu orsamentu 2021 ba diresaun no órgaun tutela sira, Ministru Asuntu Parlamentár no Komunikasaun Sosiál (MAPKOMS), Francisco Jerónimo, enkoraja mídia estatál Rádiu Televizaun Timor-Leste (RTTL,E.P) no Agência Noticiosa de Timor-Leste, Tatoli,I.P atu kontinua dezempeña serbisu ho di’ak atu fornese informasaun ba públiku.

Órgaun komunikasaun sosiál Estadu rua ne’e iha relasaun dependénsia no tutela ba MAPKOMS, tanba ne’e ba RTTL,E.P, Ministru motiva atu halo mudansa tanba sei halo avaliasaun.

“Kona-ba RTTL, ha’u sei fó tempu ba sira to’o dezembru no ha’u hakarak haree saida maka sira halo no rezultadu saida maka atu iha. Hafoin ha’u rasik sei halo avaliasaun hodi haree ba oin saida maka bele halo di’ak liu ba oin,” tenik Ministru Francisco ba Agência Tatoli, iha Palásiu Governu, segunda ne’e.

Governante ne’e dehan, ba oin kuandu iha mudansa di’ak maka sei kontinua ho mudansa ne’e rasik maibé ladi’ak maka ministériu tutela sei halo revizaun filafali ba estatutu rasik atu hadi’a.

“Presiza haree ho di’ak tanba RTTL rasik hanesan empreza públika tenke iha planu negósiu klaru atubele iha reseita rasik,” nia akresenta.

Governante ne’e nota katak Timór hanesan rai ki’ik-oan ida no merkadu mós laiha, tanba ne’e hanesan buat todan ida.

“Ita halo sasán sira ne’e la haree ba kondisaun, tanba ne’e presiza halo estudu filafali atu haree avalia bele ka lae, se labele ita tenke foti desizaun,” Ministru subliña.

Mudansa estatutu RTTL bazeia ba dekretu númeru 42/2008 26 novembru kona-ba transforma Rádiu Televizaun Timor-Leste ba empreza públika.

Kona-ba infrestrutura, MAPKOMS prevee orsamentu ba longu prazu pur volta millaun $10 hahú iha tinan fiskál 2021 atu harii torre no edifísiu própriu.

Enkuantu ba Agência Tatoli, Ministru tau esperansa atu kontinua hatudu dezempeñu di’ak.

“Ha’u iha esperansa Tatoli hatudu dezempeñu no kontinua nafatin saida maka agora iha no hein katak iha 2021 bele muda tan hanoin ba buat ne’ebé maka atinje ona,” nia dehan.

Nia mós husu mídia estatál ne’e atu fornese informasaun di’ak ba públiku.

“Ha’u dala-ida tan hakarak Tatoli tenke iha oin atu fó informasaun ne’ebé loloos no kredível ba ema hotu,” nia fó hanoin.

Iha distribuisaun tetu orsamentu 2021 ba MAPKOMS, RTTL,E.P hetan millaun $2,193 no Agência Tatoli,I.P $669.900

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here