Fatin kuarentena iha merkadu fronteira iha Batugade, Munisípiu Bobonaro. Imajen Tatoli/Antónia Gusmão

DILI, 14 setembru 2020 (TATOLI)-Diretór Saúde Munisípiu Bobonaro, João Cardoso, hateten Ministériu Saúde iha fulan-agostu liubá re-ativa ona fatin kuarentena obrigatóriu iha fronteira terrestre Motain, Suku Batugade, Postu Administrativu Balibo Munisípiu Bobonaro.

Kuarentena obrigatóriu Motain iha kuartu 33 no kada kuartu iha kama rua ne’ebé bele akumula ema na’in rua.

Notísia Relevante :Kuarentena Motain seidauk funsiona Di’ak

”Agora daudaun ema na’in 68 mak iha hela Kuarantena Batugade tanba akumula liu kapasidade entaun ami kontaktu ona sira husi nasionál hodi mai tula ema sira ne’e bá Kuarentena Dili,” dehan nia ba jornalista sira via telefone iha Ministériu Saúde, Caicoli, segunda ne’e.

Nia dehan Kuarentena ne’ebé bele akumula ema na’in 60 maibé agora liu ona kuantidade ne’e, nune’e maka tenki transfere balun mai nasionál.

”Iha ema na’in 68 ne’e balun tama ona loron 11 atu besik kompleta ona loron 14 no balun seidauk no ema sira ne’e maioria tama ilegalmente,” nia esplika.

Servisu Saúde Munisípiu Bobonaro ho Polisia Unidade Fronteira durante ne’e la’o diak tebes hodi halo prevensaun ba transmisaun COVID-19 iha TL.

”Semana ida nia laran ne’e ka’er ema ne’ebé tama ilegál ne’e barak ezemplu 24 oras ne’e na’in neen entaun ema sira ne’e la’ós estranjeiru maibé sidadaun Timor hotu,” nia hateten.

Notísia Relevante :UPF Apoiu Kolxaun 100 Ba Kuarentena Batugade

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here