Polísia Nasionál Timor-Leste (PNTL) husi Unidade Espesial Polísia (UEP) hala'o atraksaun bainhira komemora aniversariu ba dala-XI iha Kuartel UEP, Dili, 14 agostu 2020. Imajen Tatoli/Antonio Goncalves

DILI, 14 setembru 2020 (TATOLI)- Konfrontu entre membru grupu arte marsiál husi Persaudaraan Setia Hati Terate (PSHT) ho Ikatan Keluarga Silat (IKS) Kera Sakti Timor-Leste ne’ebé akontese iha Suku Tibar, Munisípiu Liquiça, sábadu (12/09), rezulta polísia tiru joven ida hetan kanek no uma komunidade nian rua hetan estragu total.

Portavós PNTL, Superintendente Xefe Arnaldo de Araújo. Imajen Tatoli/Eugénio Pereira

Portavós Polísia Nasionál Timor-Leste (PNTL), Superintendente Xefe Arnaldo de Araújo,  haktuir kronolojia kazu ne’e akontese kauza husi festa ida ne’ebé halo iha Tibar hodi hamosu konfrontu tuda-malu husi membru  grupu arte marsiál  rua-ne’e.

Iha altura ne’ebá, Superintendente Xefe Arnaldo de Araújo hateten, mosu ona provokasaun iha festa-laran too hamosu problema sai boot hodi halo joven sira lori fatuk taka metin estrada laran. Nune’e, Pesoál PNTL na’in  haat (4) ne’ebé halo hela viajen husi Ermera atu mai Dili no ba Liquiça too dalan klaran  ho motór tama ona iha grupu rua ne’e nia klaran, derrepente masa tuda no ataka malu rezulta membru PNTL  ida kanek todan no na’in tolu kanek kaman.

Atu akalma situasaun ne’e, Arnaldo haktuir, membru polisia na’in-tolu konsege hasai pistola hodi tiru sa’e ba lalehan hodi tenta, maibé masa rua hahú ataka fali polísia sira, ikus mai membru polísia ida konsege tiru kona joven ida ho naran Ricardo H. dos Santos nia kelen.

Joven ne’e rasik nu’udar membru PSHT, husi  Suku Fatimasi, Aldeia Daregoa, Postu Administrativu  Bazartete, Munisípiu Liquiça.

Liuhusi konferénsia imprensa, ohin, iha Komandu Jerál PNTL, Caicoli, Dili, Superintendente Xefe Arnaldo de Araújo, hatutan, parte Polísia Servisu Investigasaun Kriminál (PSIK) PNTL halo ona investigasaun hodi buka tuir autór husi PSHT no IKS ne’ebé envolve iha problema  ne’e.

“Suspeitu prinsipál sira PNTL sei buka hela, ita hein tempu badak sei hatene ema se-se maka envolve, ita sei kaptura hotu,” afirma Arnaldo de Araújo.

Kona-ba vítima juventude ida ne’ebé kanek, parte PNTL lori kedas ba Ospitál Nasionál Guido Valadares (HNGV) hala’o hela tratamentu saúde.

Komandu Jerál PNTL mós hatún orientasaun ba PSIK hodi detein no halo investigasaun ba Ajente Polísia JS ne’ebé deskonfia tiru juventude ne’e.

Bazeia ba prosesu investigasaun provizóriu ne’ebé PSIK rekolla katak oknum PNTL JS ho membru sira seluk tiru duni pistola hodi salva sira nia membru polísia ida ne’ebé joven sira tuda too liman tohar.

“Iha momentu ne’ebá polísia ne’e mai husi Ermera balun atu mai Dili no balun atu ba Liquiça. Nia too iha Tibar mosu akontesimentu ne’e, entaun grupu rua tuda malu hela. Nia (JS) tenta akalma situasaun, maibé ema tuda malu nafatin too tuda tan sira, ikus mai polísia nain tolu mai tan husi Ermera hodi fó apoia ba membru polísia ne’e, maibé ema tuda tan sira na’in tolu, ikus mai sira tiru sa’e hodi defende sira nia aan,” hateten portavós PNTL ne’e.

Parte PSIK halo ona investigasaun iha terrenu hodi foti bala musan ne’ebé monu hela iha rai sei lori ba halo ezame balístiku hodi hatene se maka tiru joven ne’e.

“Ita hein investigasaun, se maka sala no se maka loos,” tenik nia.

Komandante Arnaldo hatutan, membru PNTL na’in-haat ne’e sai vítima, parte Komandu PNTL sei bolu hodi foti sira nia deklarasaun.

Jornalista   : Eugénio Pereira

Editór        : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here