MAPKOMS no SEKOMS halo ajustamentu orsamentu iha nível diresaun no órgaun tutela bazeia ba tetu orsamentu 2021 hosi Ministériu Finansa, iha salaun Sosiedade Sivíl, Palásiu Governu, segunda (14/09). Imajen Tatoli/Egas Cristovão

DILI, 14 setembru 2020 (TATOLI)-Hafoin Ministériu Finansa (MF) atribui tetu fiskál 2021 ba kada ministériu no instituisaun sira inklui disemina regra no prosedimentu, maka komesa halo ajustamentu orsamentu ba diresaun no órgaun tutela sira bazeia ba tetu ne’ebé atribui ona.

Tanba ne’e órgaun Estadu sira hahú halo ajustamentu inklui Ministériu Asuntu Parlamentár no Komunikasaun Sosiál (MAPKOMS) ne’ebé hetan tetu orsamentu 2021 hamutuk millaun $6,616.

Ministru Asuntu Parlamentár no Komunikasaun Sosiál, Francisco Jerónimo, informa enkontru ohin hodi diresaun no órgaun tutela sira bele aprezenta filafali tetu ne’ebé sira hetan.

“Ami halo diskusaun hodi aprova iha diresaun idaidak ninia, iha diresaun balun maka hakarak osan aumenta tan maibé ami nia orientasaun maka ida ne’ebé bele justifika katak iha razaun prinsipál tenke iha maka ami sei konsidera, maibé ida ne’ebé lae ami sei ko’a,” dehan Ministru Francisco ba Agência Tatoli, iha salaun Sosiedade Sivíl, Palásiu Governu, segunda ne’e.

Iha biban hanesan, Diretór Jerál MAPKOMS, Ponciano da Cruz Leite, hateten enkontru ohin la’ós enkontru preleminár maibé atu halo apresiasaun tetu orsamentu ne’ebé MF distribui ona ba MAPKOMS.

Gabinete MAPKOMS propoin $803.000, Gabinete Sekretaria Estadu Komunikasaun Sosiál (SEKOMS) $774.000, Gabinete Asuntu Parlamentár $90.000, Gabinete Inspesaun $34.500, Dirasaun Jerál Administrasaun  ba Diretór Jerál $41.000 (saláriu no vensimentu, bens servisu), Diresaun Administrasaun no Finansa $65.000, Diresaun Nasionál Aprovizionamentu  no Lojíztika $95.000, Diresaun Nasionál Diseminasaun Informasaun $883.000, Diresaun Nasionál Sentru Rádiu Komunidade $479.000, CEFTEC $662.000.

Enkuantu ba mídia Estatál, Agência Tatoli,I.P $669.900, Rádiu Televizaun Timor-Leste, empreza públika (RTTL,ep) millaun $2,193, Diresaun Nasionál Rekursu Umanu (foun) $30.000 no Unidade Planeamentu (foun) $23.000.

“Ida-ne’e nu’udar orsamentu ne’ebé idaidak propoin, osan ne’ebé sira propoin infelizmente liu ona tetu ne’ebé ami hetan. Ami hetan tetu millaun $6,616 maibé diresaun idaidak propoin osan boot liu hamutuk millaun $6,855,” nia subliña.

Tanba ne’e, tuir Diretór ne’e, MAPKOMS sei halo esforsu atu ajusta ho tetu.

“Iha osan $230.000 maka liu hosi tetu ne’ebé Ministériu Finansa fó, maibé hetan orientasaun hosi Ministru no Sekretaria Estadu atu tuur hamutuk ho diresaun sira hodi ajusta halo saida maka bele, la’ós halo buat ida dala ida de’it,” nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here