Prezidente Repúblika, Francisco Guterres Lú Olo. Imajen António Gonçalves

DILI, 14 setembru 2020 (TATOLI)—Prezidente Repúblika, Francisco Guterres ‘Lú Olo’, ohin, promulga ona Dekretu-Lei ba kriasaun subsídiu ba profisionál sira ne’ebé dezenvolve atividade jornalístika durante implementasaun estadu emerjénsia ho kondisaun espozisaun direta ba virus SAR-Cov-2 no moras COVID-19.

Profisionál sira ne’ebé dezenvolve atividade jornalístika iha papel importante tebe-tebes tanba responsabiliza ba preparasaun no diseminasaun informasaun hotu-hotu relasiona ho prevensaun no kontrolu surtu COVID-19 iha Timor-Leste. Profisionál sira ne’ebé dezenvolve atividade jornalístika  iha Centro de Convenções de Díli, no iha lokais ne’ebé dezenvolve asaun sira prevensaun no kontrolu, nomeadamente iha sentru izolamentu, postu sira iha fronteira no estabelesimentu saúde, ho kondisaun espozisaun direta ba COVID-19 virus SAR-Cov-2 no risku ba dezenvolvimentu moras COVID-19.

Dekretu-Lei ne’e kria subsídiu ba profisionál sira ne’ebé dezenvolve atividade jornalístika, tuir Lei númeru 5/2014, 19 novembru, Lei Komunikasaun Sosiál, hamutuk ho Sala  Situasaun  Sentru Integradu  Jestaun Krize durante implementasaun Estadu Emerjénsia deklaradu no renovadu hosi Dekretu Prezidente Repúblika númeru 29/2020, 27 marsu, 32/2020, 27 abril no 35/2020, 27 maiu, ho kondisaun espozisaun direta ho virus.

Kondisaun sira ba atribuisaun subsídiu, tuir Dekretu-Lei, mak profisinál sira ne’ebé dezenvolve atividade jornalistika hamutuk iha Sala Situasaun  Sentru Integradu  Jestaun Krize ka tanba Governu husu atu halo produsaun notísia durante implementasaun Estadu Emerjénsia sei hetan subsídiu finanseiru ba kada loron efetivu serbisu ninan, tuir kondisaun sira ne’ebé temi iha Dekretu-Lei refere.

Profisionál sira ne’ebé sei hetan subsídiu ne’e mak sira ne’ebé integra iha Sentru Mídia COVID-19 husi Unidade Informasaun Públika no profisionál sira ne’ebé la integra iha Sentru Média COVID-19.

Ministru ba Asuntu Parlamentar no Komunikasaun Sosiál sei atribui subsídiu bazea ba informasaun hosi Sala Situasaun Sentru Integradu Jestaun Krize ka hosi Diresaun Nasionál ba Diseminasaun Informasaun, liuhusi depaixu hodi aprova lista profisionál sira ne’ebé dezenvolve atividade jornalístika no prenxe kondisaun sira temi iha Derektu-Lei ne’e.

Dekretu-Lei ne’e aprova iha Konsellu Ministru, iha 12 agostu 2020.  Prezidénsia Repúblika simu Dekretu-Lei ne’e, iha 28 agostu 2020.

Komunikadu Imprensa

HAKEREK NO HATÁN

Please enter your comment!
Please enter your name here