Diretor Jeral MSSI, Rui Manuel Gago Exposto

DILI, 14 setembru 2002 (TATOLI)–Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hateten daudaun ne’e Governu análiza seidauk bele halo pagamentu ba reklamasaun sira tanba hosi totál reklamante rihun 15.764 foin mak halo análiza ba reklamante purvolta rihun 13.314 no rihun rua (2000) resin mak sei iha prosesu análiza nia-laran. 

“Ita halo análiza reklamante purvolta rihun 13.314 ona no falta rihun rua-resin hanesan ne’e mak seidauk tanba ekipa sei kontinua haree no halo análiza. Parese, aban ka bainrua ita bele finaliza no bele entrega ba Ministériu Administrasaun Estatál (MAE) hodi verifika fila-fali hafoin halo pagamentu ne’e,” dehan Diretór Jerál MSSI, Rui Manuel Gago Exposto, ba Agência TATOLI, iha nia knaar fatin Caicoli, Dili, segunda ne’e.

Nia dehan, hosi reklamante rihun 13.314 ne’ebé ekipa reklamasaun halo análiza hotu ona ne’e hosi munisípiu 8 hanesan Munisípiu Aileu, Ainaro, Baucau, Covalima, Lautem, Liquiça, Manatuto, no Munisípiu Manufahi no haat (4) seluk ne’ebé mak seidauk finaliza hanesan Viqueque, Ermera, Oé-Cusse no Dili.

Nia informa, munsipiu sira ne’ebé mak finaliza ona mak Munisípiu Aileu 321, Ainaro 1274, Baucau 898, Bobonaro 1357, Covalima 566, Dili 4786, Ermera 1812, Lautem 939, Liquica 1131, Manatuto 437, Manufahi 337, Oe-Cusse 974 no Munisípiu Viqueque 932.

Entretantu Munisípiu Dili mak foin halo análiza ba 2.904, Munisípiu Ermera análiza ona1674, Munisípiu Oe-cusse análiza ona 816 no Munisípiu Viqueque análiza ona 762.

Diretór MSSI hatutan, ekipa reklamasaun ne’e daudaun ne’e konsentra hela ba Munisípiu Dili nian tanba Dili nian iha reklamante barak liu tanba ne’e sira sei foka uluk lai ida-ne’e.

“Tanba reklamante iha Dili nian hamutuk 4.786, nune’e ita sei halo konsnetrasaun uluk lai ba Dili. Depois, ekipa ida ka rua mak ba fali munisípiu tolu (3) seluk tanba sira ne’e reklamante uitoan de’it,” nia dehan.

Bainhira ekipa reklamasaun halo análiza hotu, Rui Exposto haktuir, sei haruka naran reklamante hotu ba MAE karik iha dúvida hosi dadus reklamasaun hirak ne’e, tanba ne’e mak sei haruka ba MAE hodi verifika liuhosi autoridade sira para kompleta.

“Ita sei fó tempu ba MAE loron-10 hodi verifika no dadus dúvida sira hanesan kartaun eleitorál laiha. Hafoin deside halo pagamentu ba reklamante sira,” Rui haktuir.

Maibé Diretór Jerál MSSI ne’e hatete, naran elizivél ne’ebé mak klareza ona hanoin taka daudaun ba iha suku sira depois mak hein dadus dúvida sira nune’e bele klareza ba públiku sira.

Nia dehan sira-nia ekipa reklamasaun kontinua tenta hodi bele finaliza iha fulan ne’e, nune’e bele halo planu pagamentu iha fulan setembru nia rohan, se lae iha inísiu fulan outubru tinan ida-ne’e.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here