Imajen ilustrasaun/Google

DILI, 14 setembru 2020 (TATOLI) – Sorte aat no bele dehan mehi aat ne’ebé akontese iha lala’ok domin alin feto ida ho inisiál DS  ho nia doben J (mane). Tanba hadomi malu, sira na’in-rua promete malu la’o halimar husi Ermera mai Dili no tuur iha tasi-ibun hodi hola anin-tasi iha area Tasi-Tolu nian.

Alin feto DS hadomi no estima tebes nia doben J, nune’e iha loraik ne’ebá sira na’in-rua tula-malu ho motor husi Ermera mai Dili. Ironia tebes. To’o iha tasi-ibun area Tasi-tolu nian, DS ho nia doben J para tiha hodi dada iis no hola anin-tasi. Mas derrepente de’it J abandona tiha DS iha tasi-ibun ho kondisaun dezmaia.

Liuhusi investigasaun polísia nian, Komandante PNTL Munisípiu Dili, Superintendente Xefe, Henrique da Costa,  dehan, vítima DS haktuir ba Polísia Servisu Investigasaun Kriminál (PSIK), katak iha lokraik ne’e, nia parte ho nia namoradu ho motór mai husi Ermera hodi tuur halimar iha tasi-ibun, nune’e durante sira tuur hela, derrepente ninia namorada J abandona tiha nia mesak iha rai-henek leten ho kondisaun dezmaia ona.

“Ita hetan informasaun balun hatudu katak, ema besik  DS maka envolve, maibé ita hein vítima rekupera hodi lori vítima ba too nia uma, hodi haree ema ne’ebé halo viajen ho nia husi Ermera too Dili, depois oinsá maka bele mosu asidente husik tiha nia mesak,” informa Superintendente Xefe, Henrique ba jornalista, ohin, iha Komandu PNTL, Caicoli, Dili.

PNTL kontinua koopera ho vítima DS ne’ebé halo hela tratamentu saúde iha Ospitál Nasional Guido Valadares (HNGV) too rekupera ona sei lori nia fila ba nia uma, depois sei kontinua halo investigasaun vítima nia doben inisiál  J ne’ebé abandona vítima.

 Jornalista    : Eugénio Pereira 

Editór           : Francisco Simões

HAKEREK NO HATÁN

Please enter your comment!
Please enter your name here