Governadór BCTL, Abrãao de Vasconselhos, atribui prémiu Central Bank Award ba Jornalista António Sampaio hosi Agência Lusa, iha ámbitu selebrasaun aniversáriu dasia Banku Sentrál, iha Akait, segunda (14/09). Imajen/António Sampaio

DILI, 14 setembru 2020 (TATOLI)-Iha ámbitu aniversáriu dasia Banco Central Timor-Leste (BCTL), hili Jornalista António Sampaio hosi Agência Lusa sai vensedór ba Central Bank Award 2020 ba kategoria mídia no jornalista, enkuantu Banco Nacional Ultramarino (BNU) sukursál Timor-Leste sai vensedór ba kategoria instituisaun finanseira.

Prezidente Komisaun no atuál Vise-Governadór BCTL, Venâncio Maria Alves, informa kandidatu ba prémiu sertifikadu ne’e maka hanesan GMN-TV, António Sampaio hosi Agência Lusa iha Timor-Leste, no Agência Tatoli,I.P, maibé hafoin halo selesaun ho kle’an no tuir prosesu konsulta deside nomea mídia no jornalista portugés.

“Manan-na’in hetan Central Bank Award 2020 ho kategoria exelente tanba halo kontribuisaun exelente hodi hakerek notísia simples, informativu no reflete loloos fonte informasaun sira ho kualidade aas tuir BCTL nia observasaun, ne’ebé bele influensia no fasilita kompreensaun públiku ba dezenvolvimentu setór finanseira no inkluzaun finanseira iha Timor-Leste,” Prezidente Komisaun anúnsia iha ámbitu seremónia aniversáriu BCTL dasia iha resintu Banku Sentrál, Akait, segunda ne’e.

Prezidente Komisaun dehan, iha kategoria instituisaun finanseira ne’ebé sai manan-na’in ba prémiu Central Bank Award 2020 ne’e mak Kaixa Jerál Depózitu sukursál Timor-Leste BNU Timor-Leste no tama iha kategoria nominál ka liu selesaun mak Telemor Filtex Lda, no Telling digital solution Lda.

“Instituisaun finanseira ne’e liu selesaun tanba prestasaun servisu di’ak, inovasaun iha sistema finanseira, no kolabora di’ak tebes hodi implementa sistema P24 iha Timór,” nia subliña.

Tuir Vise-Governadór,  prémiu ne’ebé atribui ba manan-na’in sira iha valór atu hakarak fó motivasaun ba mídia no instituisaun finanseira sira, atu kontinua kontribui ajuda Governu no dezenvolve sistema finanseira.

Sorin seluk, Governadór BNCTL, Abrãao de Vasconselhos, hateten ba prosesu selesaun kategoria mídia, koordena ho Concelho de Imprensa.

“Ba kategoria mídia ninian, Banku Sentrál iha ekipa komisaun ne’ebé serbisu hamutuk ho Concelho de Imprensa. Agradese ba diskusaun sira, Banku Sentrál hakarak tinan ba tinan ita mellora prosesu atu aprezenta kandidatura no mós prosesu selesaun,” nia subliña.

Reprezentante BNU, Paul Lopes, agradese ba komisaun tanba bele hili ona BNU sai vensedór prémiu.

“Durante tinan hira ona serbisu iha Timór sempre hasoru dezafíu, maibé  BCTL sempre apoia no koopera ho ami ba inisiativa sira hodi kontribui ba dezenvolvimentu sistema finanseira Timór. Prémiu ne’e surpreza ida ba ami, ne’ebé agradese tebes,” dehan Paul Lopes.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here