Krime finanseira. Imajen/Tutasa

DILI, 14 setembru 2020 (TATOLI)-Banco Central Timor-Leste (BCTL) agradese entidade relevante sira-nia apoia durante ne’e iha prosesu investigasaun ba krime finanseira iha Timor-Leste.

“Ha’u agradese Prokuradoria Jerál Repúblika (PGR, sigla portugés) ba ita bo’ot sira-nia apoia liuliu iha investigasaun ba krime iha setór finanseira, Ministériu Públiku (MP) no Polísia Sientífika Investigasaun Kriminál (PCIC, sigla portugés) ba kontribuisaun iha prosesu ne’ebé mak boot tebes atu la fó espasu krime iha setór finanseira, liuliu krime iha área má utilizasaun plataforma eletrónika sira ne’e” dehan Governadór BCTL, segunda ne’e iha resintu Akait.

Jerente ne’e konsidera kombate krime iha setór finanseira importante tanba labele husik krime ne’e mosu.

“Ita agora iha faze dezenvolvimentu sistema pagamentu nasionál tanba ne’e ita labele husik ema tenta ataka sistema sein iha kanalizasaun no iha kazu ida rua ne’ebé konsege tulun hosi parte rua, ida ne’e mensajen klaru tebes ba ema hotu katak labele abuza sistema eletróniku P24 tanba autoridade sira ajuda tau-matan ba sistema ida ne’e,” nia fó hanoin.

Atu evita krime finanseira, antes ne’e BCTL implementa rekezitu foun atu identifika kliente ninia detallu, kria programa treinamentu ba funsionáriu sira ho matéria anti brankeamentu kapitál no kombate finansiamentu terrorizmu.

Aplika ba banku komersiál sira mak kona-ba relatóriu tranzasaun, ne’ebé bainhira iha tranzasaun cash ho $10.000 ba leten, obrigatoriamente tenke hato’o relatóriu ba Banku Sentrál, ne’ebé kria ona plataforma online no permite la presiza haruka suratahan maibé aprezenta relatóriu ho forma eletróniku.

Biban ne’e, Governadór apresia ba kontribuisaun instituisaun finanseira sira-nia apoia maski iha tinan 2020 hasoru situasaun difísil maibé sistema atinje tiha ona prosesu lubuk boot ida iha períodu ne’e kompara ho nasaun seluk, sistema Timór mós iha avansu boot tebes.

“Hakarak agradese ba parseiru sira hotu, liuliu Governu, Diresaun Jerál Estatístika, Servisu Rejistu Verifikasaun Emprezariál (SERVE), Institutu Apoiu Dezenvolvimentu Emprezariál (IADE) no entidade sira seluk,” nia akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here