Governadór BCTL, Abraão de Vasconselhos. Imajen Tatoli/António Gonçalves

DILI, 14 setembru 2020 (TATOLI)-Governadór Banco Central Timor-Leste (BCTL), Abrãao de Vasconselhos, husu banku komersiál sira ne’ebé opera iha Timor-Leste atu hatudu solidaridade iha situasaun difísil no kontribui ba implementasaun programa Governu.

“Ha’u hakarak husu ba banku komersiál sira hotu tenke hatudu solidaridade iha situasaun difísil, Banku Sentrál kontinua nafatin kompromete hakarak tau an hanesan instituisaun ne’ebé mak iha relevánsia, liuliu iha situasaun sira hanesan ne’e maibé la’ós de’it papél Banku Sentrál nian ne’ebé maka iha limitasaun oituan. Maski nune’e hakarak ekonomia rai-laran bele manan iha momentu ida hanesan agora,” dehan Governadór BCTL, segunda ne’e iha resintu Akait.

Daudaun ne’e, banku komersiál iha Timor-Leste maka Banku Nasionál Komérsiu Timor-Leste (BNCTL, sigla portugés) ne’ebé na’in maka Estadu Timor-Leste no banku privadu seluk hanesan Mandiri, Bank Rakyat Indonesia (BRI), Banco Nacional Ultramarino (BNU), no ANZ.

Jerente ne’e fó ezemplu, hanesan programa kréditu emerjénsia ne’ebé Governu atu implementa, bainhira banku komersiál sira la fó kontribuisaun atu ajuda implementa maka programa ne’e sei la la’o.

“Ami iha Banku Sentrál hakarak apresia Governu ba esforsu hotu ne’ebé mak halo, liuliu iha situasaun ne’e bele hatudu inisiativa dezeña programa iha tempu difísil atu implementa maski ita hatene katak ita-nia kapasidade atu atua sei iha limitasaun oituan,” dehan Abrãao.

Nia mós nota katak introdusaun alterasaun polítika ba sistema garantia kréditu, ne’ebé inklui ona mikro finanseira hanesan negósiu la’ós ona setór prinsipál hanesan agrikultura, indústria, komérsiu.

BCTL otimista maski Timor-Leste enfrenta difikuldade maibé aprezenta oportunidade boot tanba iha rekursu atu uza.

“Ita-nia fundu petróleu konserteza iha no ita presiza implementa programa sira ne’ebé balun nesesáriu utiliza rekursu hosi fundu úniku ne’e. Ida-ne’e naturalmente bele akontese tanba setór hotu iha sosiedade hakarak hetan tulun hosi Estadu, ida ne’e ha’u hanoin Governu presiza tau atensaun,” nia subliña.

Maski nune’e, Governadór BCTL konsidera katak situasaun finanseira bankária Timor-Leste iha tinan ne’e hatudu progresu di’ak oituan kompara ho tinan 2019.

“Buat ida importante tebes hakarak partilla maka situasaun finanseira bankária Timor-Leste hatudu situasaun di’ak oituan kompara ho tinan kotuk. Ida-ne’e hatudu dala-ida tan katak ita bo’ot (banku komersiál) sira-nia papél agora presiza hatudu tanba programa oioin ne’ebé Governu implementa sei la signifikante no signifikante kuandu banku komersiál sira la fó sira-nia liman,” nia subliña.

Jornalista: Antónia Gusmão

Editora: Julia Chatarina  

HAKEREK NO HATÁN

Please enter your comment!
Please enter your name here