Eis Xefe Negosiadór Prinsipál Delimitasaun Fronteira Marítima, Kay Rala Xanana Gusmão, Kay Rala Xanana Gusmão. Imajen Tatoli/Egas Cristóvão

DILI, 12 setembru 2021 (TATOLI)-Eis Xefe Negosiadór Prinsipál Delimitasaun Fronteira Marítima, Kay Rala Xanana Gusmão, rekomenda Governu atuál presiza define didi’ak polítika dezenvolvimentu setór petrolífera, liuliu ba dezenvolvimentu kampu Greater Sunrise.

Líder karizmátiku ne’e hato’o kestaun ne’e, liuhosi semináriu Movimentu Profosionál Apoio Maun Boot Xanana Gusmão (MOPAX) ho tema “Maun Boot Kay Rala Xanana Gusmão ho P-CNRT nia ukun mak bele asegura riku-soin Timor-Leste nian”

“Ha’u rekomenda Governu foun atu tau interese nasionál aas tanba ami halo ona estudu no la’o kuaze nasaun hotu hodi haree katak téknikamnete no polítikamente viável ona atu dada Greater Sunrise mai iha Timor-Leste,” tenik Xanana Gusmão, iha salaun  Katedral, Vila-verde, sábadu (12/09).

Líder Nasionál ne’e dehan, durante nia mandatu hanesan Xefe Negosiadór, hamutuk ona ho ekipa Timor Gás no Petróleu, Empreza Públika (Timor GAP,E.P) no Autoridade Nasionál Petroleu no Minerál (ANPM) konsege halo ona estudu barak no vizita ba kompañia internasionál sira hodi mai investe iha Greater Sunrise.

“Ami to’o ona kompañia ida iha Jerman, ne’ebé solda pipa no sira iha interese atu mai investe hodi dada pipeline mai Timor-Leste,” nia akresenta.

Ho nune’e, eis Primeiru-Ministru ne’e husu partidu polítiku sira hotu atu labele politiza dezenvolvimentu setór petrolífera tanba kestaun ne’e konsidera hanesan interese nasionál.

“Ha’u dehan polítikamente viavél tanba ita sosa ona asaun hosi kompañia Conocophillips no Shell, ne’ebé ita-nia asaun hamutuk porsentu 56,56, kompara ho kompañia operadór hotu no téknikamente viável tanba ita halo ona estudu no dezeñu di’ak,” Xanana garante.

Iha biban hanesan, Eis Prezidente ANPM, Gualdino da Silva, reforsa Governu tenke tau importánsia ba estudu ne’ebé iha ona.

“Estadu Timor-Leste iha ona polítika no tékniku ne’ebé di’ak atu dada kadoras ka Greater Sunrise mai Timor-Leste, maibé importante mak Governu agora tenke fó prioridade ba kestaun ne’e”, nia fó hanoin.

Antes ne’e, Ministru Petróleu no Minerál, Víctor da Conceição Soares, informa prosesu negosiasaun projetu kampu petrolífera, Greater Sunrise la’o hela iha nível bilaterál no trilaterál.

Tuir Ministru Víctor, iha tinan ne’e finaliza ona konseitu dezenvolvimentu kampu petrolífera no Estadu halo ona kontratu ho Austrália no kompañia konsórsiu sira, inklui Timor GAP,EP, nune’e iha fulan-neen nia laran bele finaliza rejime kontratuál no fiskál ba projetu kampu Greater Sunrise.

Hafoin Governu Timor-Leste no Austrália troka nota diplomátika kona-ba tratadu fronteira marítima no entra ein vigór 30 agostu 2019, Estadu Timor-Leste liuhosi ANPM hala’o negosiasaun ho Governu Austrália no kompañia sira hodi finaliza konseitu dezenvolvimentu kampu.

Ba kestaun ne’e, Estadu rua halo hela negosiasaun hodi iha konkordánsia mak bele hala’o esplorasaun ba kampu petrolífera tanba media line ne’ebé fahe fronteira, kampu ne’e balun tama iha área jurizdisaun Austrália.

Iha prosesu negosiasaun antes ne’e, bainhira kadoras dada mai Timor-Leste sei a-favór porsentu 70 no Austrália hetan porsentu 30, enkuantu bainhira dada ba Austrália a-favór porsentu 20 no ba Timor-Leste porsentu 80.

Iha tinan 2019, Conocophilips fa’an asaun konkórsiu projetu Greater Sunrise ba Timor-Leste ho kustu millaun $350 (ekivalente prosentu 30 husi totál), ne’ebé kontratu partilla iha produsaun 03-19 no 03-20.

Nune’e mós, sosa tan asaun Shell Energy nian ho kustu millaun $300, ne’ebé reprezenta porsentu 26,6.

Tanba ne’e daudaun, Timor-Leste iha partisipasaun másimu iha konsórsiu projetu Greater sunrise (reperezenta hosi Timor GAP) ho Partisipasaun hamutuk porsentu 56,56, Woodside (operadór) ho porsentu 33,4 no Osaka Gás reperzenta porsentu 10.

Jornalista: Florêncio Miranda Ximenes

Editora: Julia Chatarina

 

HAKEREK NO HATÁN

Please enter your comment!
Please enter your name here