Ministra Saude, Odete Maria Freitas Belo, entrega tais no kaebauk ba Reprezentante OMS, Rajesh Pandav.Imajen/Midia MS.

DILI, 11 setembru 2020 (TATOLI)-Ministériu Saúde, iha sesta (11/09), halo ona serimonia despedida ba Reprezentante Organizasaun Mundiál Saúde (OMS), Rajesh Pandav, tanba ninia mandatu servisu ramata ona iha Timor-Leste hodi hala’o misaun foun iha nasaun Nepál.

Reprezentante OMS ne’e hala’o ona misaun iha Timor-Leste durante tinan 10 ona. Antes asume kargu hanesan Reprezentante Organizasaun Mundiál Saúde, nia hala’o servisu hanesan asesór iha Ministériu Saúde.

”Ita hotu triste maibé tempu mak halo sempre muda servisu iha se de’it entaun ita boot nia servisu durante iha Timor-Leste servisu ne’ebé mak di’ak no apoiu tebes Ministériu Saúde,” dehan Ministra Saúde, Odete Maria Freitas Belo, iha ninia diskursu durante serimonia despedida iha salaun MS Caicoli.

Durante asume kna’ar iha TL, Odete rekoiñese kontribuisaun husi Rajesh Pandav, ba dezenvolvimentu iha setór saúde.

Iha biban hanesan Vise Ministru Saúde,  Bonifácio Maucoli dos Reis, hateten Rajesh Pandav, fó ona kontribuisaun ba dezenvolvimentu iha área saúde nian komesa kedas iha Governu Konstitusionál da Haat to’o agora.

Entretantu, iha serimonia despedida ne’e, Ministériu Saúde entrega mós tais, kaebauk ba Rajesh Pandav ho ninia espoza hanesan rekordasaun antes husi hela TL hodi hala’o misaun foun iha Nepál.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here