Eis Prezidente ANPM, Gualdino da Silva. Imajen Tatoli/António Gonçalves

DILI, 12 setembru 2021 (TATOLI)-Eis Prezidente Autoridade Nasionál Petróleu no Minerál (ANPM), Gualdino da Silva, sujere Governu atu kria tan lei fundu mineiru atubele rai reseita sira hosi rekursu minerál bainhira dezenvolve ona.

“Ita prezisa tan kria lei fundu mineiru atu rai reseita rekursu minerál hafoin dezenvolve no halo esplorasaun hanesan ho lei fundu petrolífera ne’ebé ita rai reseita rekursu petrolífera,” tenik Gualdino da Silva bainhira halo aprezentasaun iha semináriu Movimento Profisionál Apoiu Maun Boot Xanana Gusmão (MOPAX) ho tema “Maun Boot Kay Rala Xanana Gusmão ho P-CNRT nia ukun mak bele asegura riku-soin Timor-Leste nian”, iha salaun Katedral, Vila-verde, sábadu ne’e.

Tuir Gualdino, razaun Governu presiza iha tan fundu iha setór mineiru tanba haree ba potensialidade rekursu minerál liuhosi estudu viabilidade ne’ebé ekonomikamente viável hatama reseita ba Timor-Leste.

“Ita-nia Parlamentu Nasionál aprova ona lei kódigu mineiru, maibé presiza tan halo diskusaun ida hodi kria fali lei fundu mineiru atubele asegura reseita hosi rekursu minerál,” nia sujere.

Notísia Relevante: PN aprova projetu-lei kódigu mineiru iha faze jeneralidade

Nia haktuir, durante mandatu hanesan Prezidente ANPM, nia parte hamutuk ho ekipa sira halo ona estudu barak hodi identifika potensialidade rekursu minerál iha rai maran hanesan iha osan mean no mutin, maganés no seluk tan.

“Ha’u-nia mandatu iha ona peskiza hatudu katak ita iha rekursu minerál barak no nasaun ka kompañia barak mós iha interese ona atu investe ba esplorasaun rekursu sira ne’e, maibé rekursu minerál iha tasi laran ita seidauk bok,” nia akresenta.

Nia dehan, lei fundu mineiru ne’e atu asegura finanseiru bainhira iha ona esplorasaun no produsaun maka reseita tanba bele ba rai iha kofre fundu mineiru.

ANPM asina on akontratu ho  Kompañia Elegant Marble Group Unip, Limitada (EMG) no Kompañia Lokál Uma Marble Timor (UMT),Lda halo estudu ka peskiza mármore iha suku Uma Kaduak, Postu administrativu Laclo, Munisípiu Manatuto.

Kontratu prospesaun ho empreza EMG, hosi nasaun Xina atu halo peskiza mármore ne’e kuaze ektare 16.000, ho durasaun  peskiza durante fulan-18 ho kustu orsamentu $800.000.

Enkuantu, ANPM ho empreza UMT ho durasaun peskiza tinan ida, área peskiza ektare 400 no kustu orsamentu $600.000 ho área peskiza iha parte norte Postu Administrativu Laclo ho ektare 400.

Governu liuhosi ANPM kontinua koopera no suporta empreza EMG-UMT atu kontinua peskiza to’o susesu liuhosi lian na’in Ilimanu-Laclo fó matak Malirin no loke dalan.

Entertantu, Parlamentu Nasionál mós aprova ona lei kódigu mineiru hodi fasilita Governu atu regula atividade esplorasaun no produsaun ba rekursu minerál iha Timor-Leste.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here