Imajen/Media PR.

DILI, 11 setembru 2020 (TATOLI)–Prezidente Repúblika, Francisco Guterres Lú Olo, ohin, iha presta omenajen ba Faustino dos Santo ‘Renan Selak’ no votu pezár ba família enlutada hateten katak saudozu nia espíritu sei moris nafatin hamutuk ho ita.

Notísia Relevante: PN aprova votu pezár ba saudozu Renan Selak

“Ha’u-nia kompaneiru no irmaun ida mak mate, ho Prezidénsia Repúblika no hanesan veteranu hato’o votu pezár ba família sira hotu hodi hateten ba sira katak biar nia mate maibé nia espíritu sei la lakon no sei hela nafatin,” Prezidente Repúblika hateten.

Prezidente Repúblika hateten, partisipasaun Renan Selak durante tinan-24 iha luta armada la’o ho dignidade boot no korajen boot tebe-tebes atu luta ba povu no rai ida-ne’e ninia ukun rasik-aan.

“Nia la’o ho ami ho dignidade boot tebetebes. Ho korajen boot tetetebes atu bele luta ba Povu ida-ne’e no rai ida-ne’e ba ukun rasik-aan. Renan Selak ho ami hakat liu maluk sira-nia isin ne’ebé monu iha sorin-sorin, monu iha oin, iha kotuk. Nia hakat liu susar sira-ne’e hotu hodi hametin liután nia determinasaun ho korajen boot tebetebes atu la’o to’o nia rohan, Timor ukun rasik-aan,” prezidente haktuir.

Nu’udar Prezidente Repúblika no veteranu sente laran taridu no susar ne’ebé família sira hotu hasoru iha situasaun difísil ida ne’e nia laran.

“Laran taridu no susar ne’ebé familia sira hotu hetan. Sente iha momentu ida-ne’e, ha’u hanesan Prezidente Repúblika no mós veteranu sente saida mak imi sente. Renan Selac laiha ona iha ita-nia leet, Renan Selak ho ami halo viajen ida-ne’ebé naruk tebetebes, sakrifísiu no terus oin-oin hodi bele to’o ohin no husik hela ita hotu,” Xefe Estadu ne’e dehan.

Render Nunca A Não Ser Leva A Cabeça (Renan Selak) moris iha aldeia Ira Ara, Suku Fuiloro, Postu Administrativu Lospalos, iha loron 01 maiu 1951, nu’udar veteranu ne’ebé luta durante 24 anos iha ai-laran.

Iha tinan 2007-2012, Renan Selac asume kargu nu’udar Vise-Prezidente partidu UNDERTIM no sai membru Parlamentu Nasionál iha segunda lejislatura.

Iha 2017, Konferénsia Conselho dos Combatentes da Libertação Nacional Munisípiu Lautem nian nomea Renan Selac sai ninian Prezidente ba Munisípiu Lautem.

Iha janeiru 2020, Kongresu Nasional Conselho dos Combatentes da Libertação Nacional hili Renan Selak sai ninia Vise-Prezidente.

Iha tinan-2018, Prezidente Repúblika kondekora Renan Selac ho Kolár Ordem Timor-Leste.

Renan Selac hakotu iis iha 10 setembru 2020, iha Hospitál Nasionál Guido Valadares.

Komunikadu Imprensa

HAKEREK NO HATÁN

Please enter your comment!
Please enter your name here