Segundu Komandante Polísia Munisípiu Dili, Superintendente Asistente Euclides Belo. Imajen/Antonio Goncalves

DILI, 11 setembru 2020 (TATOLI)-Polisia Nasionál Timor-Leste Munisípiu Dili husi Unidade Task Force, sesta ne’e detein estudante Aliansa Universitáriu Timor-Leste (AUTL) na’in 17 tanba halo manifestasaun hasoru Ministru Ensinu Superiór Siénsia no Kultura (MESSK), Longuinhos dos Santos, iha edifísiu Ministru Colmera Dili.

Estudante sira halo asaun manifestasaun hasoru Governu tanba seidauk iha desizaun ba pedidu atu fó subsídiu ba estudante sira hodi aplika propinas gratuita durante implementasaun Estadu Emerjénsia.

Notísia Relevante :AUTL ejize Governu kria fali dekretu-lei foun

Segundu Komandante PNTL Munisípiu Dili,  Superintendente, Euclides Belo, hateten PNTL detein sira tanba la obiedensia no kontra regra manifestasaun metru 100 ho edifísiu Instituisaun Públiku.

”Sira na’in 17 ita detein tanba komete erru hodi hatudu komportamentu dezobidensia ba regra manifestasaun nian ne’ebé mak hatúr iha kodígu penál artigu 244 tan ne’e ita detein ona iha sela komando PNTL Caicoli,” dehan nia ba jornalista sira iha Caicoli.

Estudante na’in 17 ne’e mane hotu no sira sei kumpre sela durante oras 72, depois sei aprezenta ba Ministériu Públiku hodi submete ba prosesyu interogatóriu dahuluk iha Tribunál Distritál Dili.

Entrentantu, Ministru Ensinu Superiór Siénsia no Kultura (MESSK), Longuinhos dos Santos, hateten triste ho desizaun PNTL hodi detein estudante sira tanba halo manifestasaun hasoru nia.

“Ha’u husu ba alin estudante sira atu kumpre sira nia dever no diretu hodi estuda, no dever loloos estudante nian mak atu selu propinas inklui diretu atu hetan siénsia ida ho kualidade,” dehan nia.

Notísia Relevante :Asaun pasífiku AUTL kumpre regra

Jornalista : Tomé Amado

Editór       : Agapito dos Santos.

HAKEREK NO HATÁN

Please enter your comment!
Please enter your name here