Prezidente Parlamentu Nasionál, Aniceto Guterres no deputadu sira presta omenajen ba matebian Eis Deputado Faustino dos Santos “Renan Selac”. Imajen Tatoli/ Egas Cristóvão

DILI, 11 setembru 2020 (TATOLI)—Hafoin aprova votu pezár, Parlamentu Nasionál hala’o sesaun solene omenajen ba momoria sudozu Faustino dos Santos “Renan Selak” nu’udar antigu deputadu iha lejislatura daruak nian.

Notísia Relevante: PN aprova votu pezár ba saudozu Renan Selak

Iha sesaun solene omenajen ba memoria Renan Selak prezide hosi Prezidente Parlamentu Nasionál, Aniceto Longuinhos Guterres Lopes, akompaña hosi Vise-Prezidente Parlamentu Nasionál Deputada Maria Angelina Sarmento Lopes no Vise-Prezidente Parlamentu Nasionál, Luis Roberto.

Prezidente Parlamentu Nasionál, Aniceto Longuinhos Guterres Lopes, hateten ema idak-idak konstroi ninia istória moris hamutuk ho ema seluk ho ambiente ne’ebé la hanesan.

“Moris hahú uluk nia odamatan ba ita hotu maibé ho oras serta, ne’ebé la hanesan ba ema idak-idak. Ne’e realidade inegável no insubstituível. Ohin, veteranu 24 anos Renan Selak ninia última vizita mai fatin ida-ne’e (Parlamentu Nasionál). Veteranu Renan Selak konstroi nia istória moris nu’udar kombatente, ne’ebé sai mós parte ida ba Timor-Leste nia istória libertasaun no independénsia,” dehan Aniceto Guterres, liuhosi plenária Parlamentu Nasionál, sesta ne’e.

Iha sesaun solene ne’e, Xefe Bankada FRETILIN, Deputadu Francisco Miranda Branco, hateten espíritu saudozu Renan Selac jerasaun ba jerasaun sei banati tuir.

“Saudozu nia vida nu’udar gerilleiru sai hanesan ezemplu ba ita hotu atu banati tuir. Nia sakrifísiu persisténsia no lealdade hodi luta atu rai ida-ne’e bele hetan ukun rasik-aan, sai lisaun ida murak, rikusoin boot atu jerasaun ohin loron. Hosi aktu sira-ne’e mak ita kuda valór patriotizmu no nasionalizmu,” Xefe Bankada FRETILIN ne’e hateten.

Entretantu, reprezentante bankada CNRT, Deputadu Bendita Magno, hateten kontribuisaun saudozu Renan Selak durante tinan 24 ema hotu tenke hakruuk.

“Bankada CNRT no militantee tomak hato’o sentida kondolénsia kle’an ba família matebian, fó nafatin korajen no forsa ba ita-boot sira no bankada CNRT hato’o boa viajen ba saudozu Renan Selak, adeus funu na’in,” reprezentante Bankada CNRT ne’e dehan.

Xefe Bankada PLP, Deputadu Cornélio Gama “L7” haktuir, luta durante tinan 24 iha ai-laran la’ós fásil maibé iha rezultadu tanba ukun rasik aan.

“Maibé ami veteranu nia hanoin mak ne’e, ukun tenke loloos, labele halo povu terus tán,” L7 hateten.

Deputadu PLP ne’e husu saudozu Renan Selak ho saudozu sira seluk atu tulun Timor-Leste la’o ho di’ak no husu matebain sira tulun hakotu tiha inserteza polítiku iha rai laran ne’e.

Xefe Bankada Partidu Demokrátiku, Deputadu António da Conceição “Kalohan” hakru’uk hodi hananu nafatin obra lulik ne’ebé aman sira husik ona.

“Ami-nia kondolénsia kle’an ba família no orasaun, atu Aman Maromak haraik nafatin deskansa hakmatek iha reinu rohan laek. Deskansa ho pás, eroi ba pátria,” Xefe Bankada PD ne’e deklara.

Faustino dos Santos “Renan Selak”, moris iha loron 1 fulan-maiu tinan 1957, moris fatin iha aldeia Ira-Ara, suku Fuiloro, postu administrativu Lospalos, munisípiu Lautem. Saudozu Faustino dos Santos “Renan Selak” oan hosi família “No Reci ho Nuku Malai”. Faustino dos Santos”Renan Selac” oan daruak hosi maun-alin na’in haat (4), feto tolu (3) no mane nia mesak. Saudozu hakotu iis iha Hospital Nacional Guido Valadres (HNGV), iha loron 10 setembru 2020 ho idade 63.

Notísia Relevante: Renan Selak nia espíritu sei moris ba nafatin

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here