Saudozu Faustino dos Santos ‘Renan Selak’. Imajen/Espesiál.

DILI, 11 setembru 2020 (TATOLI)—Parlamentu Nasionál liuhosi plenária estraordinária aprova votu pezár ba saudozu eis Deputadu Faustino dos Santos “Renan Selac” hodi fó rekoñesimentu ba saudozu durante tinan 24 iha ai-laran no konstribuisaun polítika iha rai-laran.

Notísia Relevante: Biografia Renan Selak: “Render Nunca a Não Ser Leva a Cabeça”

Liuhosi Período de Antes da Ordem do Dia iha plenária estraordinária ne’e  Parlamentu Nasionál aprova votu pezár ho rezutadu votasaun a-favór 39, kontra 0 no abstensaun 0.

“Ho nune’e votu pezár ba falesimentu Faustino dos Santos “Renan Selac” aprovadu,” Prezidente Palamentu Nasionál, Deputadu Aniceto Longuinhos Guterres Lopes, anunsia liuhosi plenária Komisaun Permanente, iha Parlamentu Nasionál, sesta ne’e.

Purtantu Deputadu Bankada FRETILIN, David Diaz Ximenes haktuir, saudozu Renan Selac hatene halo jestaun ba nia-aan katak polítika mak ida-ne’ebé amizade privada no pesoál mak ida-ne’ebé.

“Maibé nia hatene katak ida-ne’e ninia maluk maibé nia hakuak nafatin para sai hotu nia maluk, ne’e mak ninia filozofia,” Mandati hateten.

Entretantu Deputadu Partidu Demokrátiku (PD), Mariano Assanami “Sabino” sente trsite ho veteranu ne’e ninia mate.

“Ita hotu laran susar tanba ita lakon ona ita-nia kamarada, kompañeiru Renan Selac. Tanba ne’e ita hotu hamutuk fó omenajen ba saudozu, pontu sira-ne’ebé saudozu husik inspira jerasaun foun no inspira ita hotu hodi ita hatutan nafatin ba futuru,” Assanami hateten.

Nune’e mós Deputadu Agustinho Siqueira “Somoxo” ho laran triste tebes ba veteanu ne’e ninia peregrinasaun iha mundu.

“Maibé ita admite, iha tempu ne’ebé hatene katak oras ne’ebé ita mate, ita hotu hein katak ezemplu sira-ne’ebé nia husik durante 24 anos bele sai inspira ita hotu,” nia dehan. 

Somoxo konsidera saudozu hanesan komandante ida-ne’ebé duro no sai polítiku ne’ebé duro ne’ebé hatudu ona durante tinan 24.

Votu pezár ne’e halo uluk molok mate-isin saudozu Faustino dos Santos “Renan Selac” tama iha pelnária Parlamentu Nasionál deputadu sira sei presta omenajen ikus.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here