Feto iha setór agrikultura. Imajen/Oxfam

DILI, 11 setembru 2020 (TATOLI)-Organizasaun Naun Govermentál (ONG), Oxfam ho kolaborasaun parseiru sira, lansa peskiza impaktu COVID-19 ba feto iha setór agrikultura no ba setór informál iha Timor-Leste.

Ministru Turizmu, Komérsiu no Indústria, José Lucas do Carmo da Silva, apresia ho peskiza ne’e tanba bele tulun ezekutivu sira foti desizaun.

“Sira halo serbisu di’ak no esensiál tebes, tanba peskiza sempre mai ho evidénsia. Evidénsia ne’ebé sira hetan importante tanba bele tulun Governu hodi bele foti medida ruma,” dehan Ministru, sesta ne’e, iha suai room, Timor Plaza.

Reprezentante Oxfam iha Timor-Leste, Salina Hanjan, hateten ONG ne’e asina ona kontratu ho Governu Austrália liuhosi programa ‘Governasaun ba Dezenvolvimentu’ (GfD, sigla inglés) no hetan fundu $15.000 hodi halo peskiza rua ne’e.

Projetu hanaran ‘Dalan di’ak ba Governasaun’, nia objetivu maka hakarak influénsia polítika públiku sira hodi foti medida.

“Durante ne’e ami uza fundu hosi Austrália hamutuk $15.000 hodi halo peskiza. Oxfam iha kompromisu apoiu Timor-Leste hodi kontinua demonstra situasaun dezenvolvimentu no importánsia partisipasaun feto,” dehan Salina Hanjan.

Ba peskiza ne’e, Oxfam kolabora hamutuk ho Mata Dalan Institute (MDI), Universidade Nasional Timor-Leste  (UNTL), Instituisaun ba Estudu Dame Konflitu no Sosiál no Profesór Brett Inder hosi Universidade Monas.

Atividade ne’e halo durante fulan-ida resin, hahú juñu to’o agostu 2020 no halo iha munisípiu neen hanesan, Baucau, Lautem, Ermera, Aileu, Covalima no Rejiaun Espesiál Oé-cusse Ambeno (RAEOA).

Reprezentante Oxfam ne’e konsidera estudu ne’e importante tebes ba dezenvolvimentu ekonomia konduzivu no sustentável.

“Haree ba estatístika hatudu katak porsentu 70 populasaun maka depende maka’as ba setór agrikultura hodi hetan rendimentu. Enkuantu ema nu’udar fa’an na’in iha merkadu porsentu 75 to’o 85 maka feto, ne’e bazeia ba relatóriu hosi TOMAK iha 2018,” nia informa.

Aleinde ne’e, porsentu 60 populasaun halo servisu iha agrikultura subsisténsia iha Timor-Leste no feto sira reprezenta 45 nu’udar agrikultór subsisténsia iha Timor-Leste.

Iha setór informál, ema 145.000 maka servisu iha negósiu hanesan fa’an iha kios, vendedór iha dalan, no iha merkadu, enkuantu ema 360.000 servisu iha setór transporte hanesan lori taxi, bus, no mikrolet.

“Iha uma-kain porsentu balun maka ninia rendimentu prinsipál maihosi atividade negósiu maibé ita haree no analiza fali ba alokasaun orsamentu iha tinan 10 nia-laran Governu investe maka’as liu ba estrutura nível boot hanesan petroleu,” nia observa.

Reprezentante Oxfam ne’e nota katak bainhira tama krize pandemia COVID-19 no situasaun polítika sai difísil liután ba setór informál no feto sira iha agrikultura.

“Iha setór informál, liuliu sira ne’ebé loke negósiu ki’ik ho rendimentu mínimu, laiha preprarasaun di’ak hodi hasoru situasaun COVID-19,” nia akresenta.

Tanba ne’e, durante pandemia globál, feto sira iha setór agrikultura hanesan inan feto faluk dalaruma  hasoru difikuldade rendimentu hodi apoiu sira-nia família tanba susar atu asesu ba merkadu.

Nune’e mós, feto ho defisiénsia balun ladun asesu ba edukasaun, servisu saúde, asesu bee no saneamentu báziku.

Jornalista: Natalino Costa

Editora: Julia Chatarina

 

HAKEREK NO HATÁN

Please enter your comment!
Please enter your name here