Ministru Turizmu, Komérsiu no Indústria, José Lucas do Carmo Silva. Imajen Tatoli/Egas Cristovão

DILI, 11 setembru 2020 (TATOLI)-Ministériu Turizmu, Komérsiu no Indústria (MTKI) halo hela preparasaun ba partisipasaun Timor-Leste iha Expo Dubai 2021.

Ministru Turizmu, Komérsiu no Indústria, José Lucas do Carmo Silva, informa daudaun ne’e instala ona edifísiu iha Sentru Konvesaun Dili (CCD, sigla portugés) hodi tékniku sira halo koordenasaun no preparasaun ba eventu mundiál ne’e.

“Ita-nia preparasaun maka atu re-instala fali edifísiu ba preparasaun Expo Dubai iha CCD no funsionáriu sira hahú serbisu iha loron 1 setembru ne’e atubele komesa halo ona  preparativu,” tenik Ministru José Lucas, foin lalais ne’e, iha edifísiu MTKI, Farol.

Ministru konsidera, Expo Dubai hanesan programa eventuál VIII Governu Kostitusionál atubele lori Timor-Leste ba mundu liuhosi partisipasaun.

Autoridade Timor-Leste ba Expo Dubai otimista katak Timor-Leste iha rekursu barak, liuliu produtu lokál no rekursu mina no gás atu promove no fa’an iha espozisaun mundiál ne’e.

“Ekipa halo preparativu ba koordenasaun liña ministeriál sira atu halo identifikasaun ba produtu saida mak ita atu lori iha outubru 2021 ba partisipa Expo Dubai ne’e,” nia dehan.

Kona-ba indentifikasaun produtu, tuir governante ne’e foin instala edifísiu ba ekipa tékniku halo koordenasaun ho liña ministeriál hodi bele identifika.

Iha loron 6 agostu, Konsellu Ministru (KM) aprova projetu rezolusaun Governu ne’ebé prosede ba alterasaun dahuluk rezolusaun Governu númeru 20/2019, 14 jullu ne’ebé nomea Autoridade Nasionál ba Expo Dubai tinan 2020.

Iha alterasaun ne’e, Ministru José Lucas maka hanesan departementu governamentál ne’ebé responsável ba konsesaun, ezekusaun, koordenasaun no avaliasaun polítika, ne’ebé define no aprova ona hosi KM ba área turizmu, atividade ekonómika komersiál no indústria.

Expo Dubai la’ós ona direitamente tutela iha Primeiru-Ministru nian okos maibé MTKI maka responsável.

Governu Emiradu Árabe Unidu (EAU) deside adia espozisaun, ne’ebé tuir oráriu eventu mundiál ne’e sei realiza iha outubru 2020, maibé muda ba loron 01 outubru 2021 to’o 31 marsu 2022, iha Dubai, EAU, tanba kauza pandemia COVID-19.

Iha área espozisaun, Timor-Leste hetan ona espasu atu halo aprezentasaun produtu iha espozisaun ne’e ho luan metru 250, ne’ebé oferese gratuitu no apartementu inklui viza ba ema importante iha Timor-Leste atu partisipa iha eventu ne’e.

Área ba espozisasaun ne’e kuaze ektare 438 iha Dubai Exhibition Center no sei partisipa husi nasaun 192 inklui Timor-Leste.

Antes ne’e, Governu Timor-Leste deside aloka orsamentu millaun $2,1 hodi partisipa eventu mundiál ne’e.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here